२०७३ असार १५ गते, बुधबार

काठमाडौँ, १५ असार । विश्वमा अनेकौ थरिका प्रेम प्रशंगहरु स्थापित छन् ।यस्तै जापानमा फेरी एउटा नौलो प्रेम कथा स्थापित हुँदैछ । यो प्रेम युवा–युवती वा पुरुष–महिलाबीच नभई एक जापानी प्रौढ नागरिक र एउटा खेलौनाबीचको हो । ६१ वर्षीय सेन्जी नाकाजिमा विवाहित पुरुष हुन् । उनका दुई सन्तान पनि छन् । तर उनी एक खेलौनासँग प्रगाढ प्रेम सम्बन्ध गाँसिरहेका छन् । साओरी नाम गरेको एउटा खेलौना उनले ६ वर्षअघि खरिद गरेका थिए । महिला आकृतिको पूर्ण कदको सो खेलौना अहिले उनको सहयात्री बनेको छ । सेन्जीले साओरीलाई खेलौना मान्दैनन् । ‘यो त मेरी प्रेमिका हो,’ उनी भन्छन्, ‘म एकछिन पनि छुट्टिएर बस्न सक्दिनँ ।’
सेन्जी भन्छन्, ‘साओरी र अरु महिलामा भिन्नता छ, यो अरुजस्तो पैसाको पछाडी भाग्दिन । यो खेलौना होइन, मेरो प्राण हो ।’ सेन्जी जहाँ गए पनि साओरीलाई साथ लिएर हिँड्छन् । एउटा ह्विल चेयरमा साओरीलाई राखेर उनी विभिन्न ठाउँमा पुग्छन्, किनमेल गर्नुपर्दा पनि सँगै लिएर जान्छन् ।
यहाँ सम्मकी, साओरीलाई नुहाइदिने, उसका सपडा धोइदिने, कपाल कोर्ने लगायतका काम पनि उनी आफैं गर्छन् । ‘अरुले जस्तो साओरीले मलाई कहिल्यै धोका दिनेछैन,’ उनी विश्वस्त भएर भन्छन् ।- एजेन्सी