२०८१ चैत्र १४ गते, बिहीबार

काठमाडौँ । अमेरिकी राष्ट्रपति डोनाल्ड ट्रम्पले विदेशबाट आयात हुने कार तथा यसका पाट्र्समा लाग्ने करको दर थप २५ प्रतिशत बढाउने घोषणा गरेका छन् । अमेरिका भन्दा बाहिर रहेका अमेरिकी कार कम्पनीहरूको उत्पादन प्लान्टहरूलाई देशभित्र फिर्ता ल्याउन ट्रम्पले पछिल्लो कदम चालेका हुन् । यो निर्णयले शुुरुआती समयमा अमेरिकी अटोमोबाइल क्षेत्रलाई नकारात्मक प्रभाव पार्ने भए पनि दीर्घकालीन रुपमा सकारात्मक नतिजा दिने ट्रम्पको दाबी छ ।
अन्तर्राष्ट्रिय सञ्चार माध्यमका अनुसार अप्रिल ३ बाट कार्यान्वयनमा आउने करबृद्धिको निर्णयपछि अमेरिकामा विदेशी कारहरू महँगा हुनेछन् । यसले फोर्ड मोटर्स, जनरल मोटर्स जस्ता अमेरिका बाहिर उत्पादन प्लान्ट रहेका कम्पनी लगायत विदेशी ब्रान्डका कारलाई असर गर्ने बताइएको छ । यी कम्पनीहरुको उत्पादन प्लान्ट क्यानाडा तथा मेक्सिकोलगायत देशमा छन् ।
विदेशबाट आयात हुने कार तथा यसका पाट्र्स बाहेक तयारी ट्रकमा समेत थप २५ प्रतिशत कर लाग्ने बताइएको छ । बेलायत सरकारले यो निर्णय लागु हुनु भन्दा अघि नै वार्ताको टेबलमा बस्न सकिने प्रतिक्रिया दिएको छ । क्यानडाका प्रधानमन्त्री मार्क कार्नीले भने आफ्नो देशको कार उद्योगमा सिधै आक्रमण भएको बताएका छन ।
युरोपेली कमिसनका प्रमुख उरुस्ला भान डियोर लेयनले कुनै प्रतिक्रिया जनाउन पूर्व छलफल गरिने बताएका छन् । अमेरिकाले गत वर्ष ८० लाख कार आयात गरेको थियो । साथै कारको बिक्री वितरणमा २४० अर्ब अमेरिकी डलर बराबरको कारोबार भएको समाचारमा उल्लेख छ ।-एजेन्सी