२०८१ चैत्र २३ गते, शनिबार

काठमाडौँ । नेपाल कम्युनिस्ट पार्टीका महासचिव तथा समाजवादी मोर्चा नेपालका संयोजक विप्लव सीले असल मानिसहरू एक हुनुपर्ने बेला आएकाे बताएका छन् । ललितपुरको हरिसिद्धिस्थित नेकपा महासचिव विप्लव सीको निवासमा शुक्रबार आयोजित ध्रुवीकरण कार्यक्रमलाई सम्बोधन गर्दै उनले सो कुरा बताएका हुन्। महासचिव विप्लव सीले सबैतिरबाट असल मानिसहरू एक हुनुपर्ने बेला आएकाे बताउदै भने- ‘माओवादीको छुट्टै आदर्श छ । आज हाम्रो पार्टीमा एउटा महत्वपूर्ण इट्टा थपिएको छ । हामीले नेपालमा आशा जगाउनुपर्छ ।”
उक्त कार्यक्रममा नेकपा माओवादी केन्द्रका प्रदेश सदस्य दिलिप श्रेष्ठसहित १४ जना नेता-कार्यकर्ता नेकपामा प्रवेश गरेका छन् । नवप्रवेशीहरुलाई नेकपा महासचिव विप्लव सी, स्थायी कमिटी सदस्य शिलु सी, गोरखा जिल्ला इन्चार्ज कपिल सीलगायतका नेताहरूले अविर र खादा लगाएर भव्य स्वागत गरेका थिए । कार्यक्रममा उपस्थित नेता-कार्यकर्ताहरूले नयाँ प्रवेशले पार्टीलाई थप ऊर्जा मिलेको बताएका थिए ।
उक्त कार्यक्रमको सञ्चालन समाजवादी ट्रेड युनियन महासंघ नेपालका अध्यक्ष टेक सीले गरेका थिए ।
माओवादी केन्द्रका प्रदेश सदस्य दिलिप श्रेष्ठसहित १४ जनाको नेकपा प्रवेशले राजनीतिक माहोललाई तताएको छ । यो ध्रुवीकरणले नेकपालाई थप बलियो बनाएको विश्लेषण गरिएको छ । नेकपाले अब देशव्यापी रूपमा आफ्नो संगठन विस्तार गर्ने र जनताको मुद्दालाई सशक्त रूपमा उठाउने योजना बनाएको बताइएको छ ।