२०८१ चैत्र २३ गते, शनिबार

काठमाडौँ । शिक्षक आन्दोलनका कारण एसइई नतिजा प्रकाशनको तालिका प्रभावित हुने सम्भावना देखिएको छ। राष्ट्रिय परीक्षा बोर्डले शिक्षकहरू आन्दोलनमा रहेकाले उत्तरपुस्तिक परीक्षण सुरु हुन नसकेको जनाएको छ। बोर्डका अध्यक्ष महाश्रम शर्माले यस वर्षको एसइई नतिजा आगामी असार पहिलो साता नै प्रकाशन गर्ने कार्यतालिका रहे पनि शिक्षक आन्दोलनका कारण प्रभावित हुन सक्ने भन्दै चिन्ता व्यक्त गरे। ‘शिक्षकहरू आन्दोलनमा रहेकाले उत्तरपुस्तिका परीक्षणको काम सुरु हुन सकेको छैन। कति दिनसम्म आन्दोलन लम्बिने हो, अनिश्चित छ,’ अध्यक्ष शर्माले भने- ‘पाँच लाख विद्यार्थीको उत्तरपुस्तिका तिनै शिक्षकहरूले नै परीक्षण गर्नुपर्ने हुन्छ। यसकारण राज्य र शिक्षक दुवै पक्षले वार्ताको माध्यमबाट संवेदनशील तवरबाट समस्याको समाधान खोज्नुपर्छ।’
शिक्षक आन्दोलन नरोकिए एसइईको नतिजा प्रकाशनमा समेत नकारात्मक असर पर्ने उनको भनाइ थियो। आन्दोलनकै कारण नयाँ विद्यार्थी भर्ना अभियानमा पनि असर पर्ने बोर्डका अध्यक्ष शर्माले बताए। उनले भने -‘सरकारले शिक्षकको माग सम्बोधन गर्न सहमति जुटाउनुपर्छ। अगामी वैशाख पहिलो साता नयाँ भर्नाको समय हो। विद्यार्थी भर्ना र कक्षा सञ्चालन अहिलेका मुख्य विषय हुन्। यसतर्फ सरकार र शिक्षक दुवै संवेदनशील बनेर वार्ताबाट समाधान खोज्नुपर्छ।’

यसैबीच , नेपाल शिक्षक महासंघले पराजुलीले सरकारको शुक्रबार राखेको वार्ताको प्रस्ताव अस्वीकार गरेको गरेको छ। महासंघको आन्दोलन परिचालन समितिकी संयोजक तथा सहअध्यक्ष नानुमाया पराजुलीले सरकारको वार्ताको प्रस्ताव अस्वीकार गरेको जानकारी दिइन्। उनले भनिन – ‘ हामीलाई वार्तामा बोलाइएको हो, तर हामीले खारेज गर्‍यौं। हामी वार्ता होइन, शिक्षा ऐन मागिरहेका छौँ। हामी आन्दोलनको मैदानमै छौं, सिंहदरबार जाँदैनौं ।
यसअघि बिहीबार कार्यवाहक प्रधानमन्त्रीको अध्यक्षतामा सरकारी पक्षबीच छलफल भएको थियो। त्यसपछि सरकारी टोलीले वार्ताका लागि शिक्षक महासंघलाई औपचारिक रूपमा बोलाएको थियो। आजको छलफलमा गृहमन्त्री, प्रमुख सचेतक, र मुख्य सचेतकहरू पनि सहभागी हुने भनिएको थियो। यद्यपि शिक्षक महासंघ नआए पनि सरकारी टोली छलफलका लागि उपस्थित थियो।
शिक्षा ऐन जारी गर्न माग गर्दै देशभरबाट शिक्षकहरू काठमाडौंमा जम्मा भएका छन्। उनीहरूले २० चैतदेखि लगातार प्रदर्शन गरिरहेका छन्। २०८० असोजमा सरकारले शिक्षा ऐन ल्याउने सहमति गरे पनि अहिलेसम्म कार्यान्वयन नभएको भन्दै महासंघले असन्तुष्टि जनाउँदै आएको छ।
महासंघले यसपटकको आन्दोलनलाई अन्तिम लडाइँ भन्दै सम्झौतामात्र होइन, ठोस कार्यान्वयन चाहिएको अडान लिएको छ।