२०८२ असार १७ गते, मंगलवार

काठमाडौँ । झापामा आठजना कोभिड सङ्क्रमित फेला परेका छन्। तीमध्ये पाँचजना झापाका छन् भने मोरङ, इलाम र दोलखाका एक/एकजना रहेको स्वास्थ्य कार्यालयका प्रमुख रमेश बाराकोटीले जानकारी दिए। झापामा कोभिडको सङ्क्रमण देखिन थालेपछि मेचीनगर नगरपालिकास्थित काँकरभिट्टा नाकामा शङ्कास्पद मानिसको कोभिड परीक्षण हुन थालेको छ। उनले भने – “काँकरभिट्टा नाकामा कोभिड परीक्षणका लागि तीनजना खटिएका छन् । जटिल प्रकृतिका बिरामीलाई कुन अस्पतालमा राख्ने भन्ने अन्योल छ।”
यसैबीच, झापामा कोभिडविरुद्धको १५ हजार मात्रा खोप आएको छ। नयाँ खोप तालिकासहित जिल्लामा कोभिडविरुद्धको १५ हजार मात्रा फाइजर खोप आएको स्वास्थ्य कार्यालयका प्रमुख रमेश बाराकोटीले जानकारी दिए। उनले भने – “झापाका पालिकाहरुसँग समन्वय गरेर खोप वितरण गर्छौं। अब नयाँ तालिकाअनुसार खोप कार्यक्रम अघि बढ्छ।”
नयाँ खोप तालिकाअनुसार पाँच प्रकारका जनसङ्ख्यालाई लक्षित गरिएको छ। रोगप्रतिरोध क्षमता कम भएका पाँच वर्षभन्दा माथिका बालबालिका, वयस्क र ज्येष्ठ नागरिकलाई प्राथमिकतामा राखिएको प्रमुख बाराकोटीले बताए।
यसैगरी, स्वास्थ्यकर्मी र बिरामीको प्रत्यक्ष सम्पर्कमा आउने व्यक्ति, गर्भवती महिला, १२ वर्ष वा सोभन्दा माथि उमेरका अन्य व्यक्ति र पाँच वर्षदेखि ११ वर्षसम्मका अन्य बालबालिकालाई खोपको प्राथमिकतामा राखिएको छ।