२०८२ असार २३ गते, सोमबार

काठमाडौँ । नवौं दक्षिण एसियाली कराते च्याम्पियनसिपमा नेपाल उपविजेता बनेको छ । नेपाल कराते महासंघका अध्यक्ष युवराज लामाले नेपाल २१ स्वर्ण, नौ रजत र २० कांस्यसहित उपविजेता भएको बताए । प्रतियोगितामा महिला ६८ केजीमाथि कराते महासंघबाट हिमालयन वारियर्स उपनाम पाएकी एरिका गुरुङ, ५० केजीमा पुष्पका लामा, ५५ केजीमुनि सविना श्रेष्ठले व्यक्तिगत र टिम कुमुतेमा नेपाललाई दोहोरो स्वर्ण दिलाएका थिए ।
प्रदीप बैजाली मगरले यू–२१ र सिनियरको व्यक्तिगत कुमुतेमा समान १–१ स्वर्ण तथा टिम कुमुतेमा रजत पदक जितेका थिए । नेपालमा भएको सातौं संस्करण र भुटानमा भएको आठौं संस्करणमा भने नेपाल टिम च्याम्पियन बनेको थियो । श्रीलंकाको कोलम्बोमा भएको प्रतियोगतामा भारत टिम च्याम्पियन बन्यो । भारतले २३ स्वर्ण, २४ रजत र १२ कांस्य जित्यो । तेस्रो स्थानको श्रीलंकाले १६ स्वर्ण, २० रजत र २३ कांस्य हात पार्‍यो । तीन स्वर्ण, सात रजत र १४ कांस्य जितेको बंगलादेश चौथो भयो । ६ राष्ट्र सहभागी प्रतियोगितामा पाकिस्तान एक रजत र सात कांस्यका साथ पाँचौं र एक रजत र एक कांस्य पदकका साथ भुटान छैटौं भयो ।