२०८२ आश्विन २२ गते, बुधबार

काठमाडौँ । औषधि व्यवस्था विभागले औषधिको प्रत्येक ब्याचको इथाइलिन ग्लाइकोल डाइइथिलिन ग्लाइकोल मिसावट नभएको सुनिश्चित गरेर मात्र उत्पादन तथा बिक्री वितरण गर्न निर्देशन दिएको छ ।
विभागले भारतका विभिन्न राज्यमा खोकीको औषधि कोल्ड्रीफ कफ सिरपले बालबालिकाको मृत्यु भएको घटनाप्रति गम्भीर ध्यानाकर्षण भएको जनाउँदै नेपालमा सो औषधि दर्ता नभएको जानकारी दिएको हो | विभागले यस्ता प्रकारका घटनाहरू विगतमा पनि भई सकेकोमा सो प्रति विभाग पहिले नै सचेत रही कार्य गर्दै आएको छ ।
नेपालमा झोल बनावटको औषधि उत्पादन तथा आयात गर्ने सबै उद्योगहरूलाई आफ्नो उत्पादनमा प्रोपाइलिन ग्लाइकोल, पोलिइथिलिन ग्लाइकोल, सोर्बिटोल र ग्लिसेरोल / ग्लिसरीन जस्ता सहायक कच्चा पदार्थ प्रयोग गर्दा तिनीहरूमा इथाइलिन ग्लाइकोल र डाइइथिलिन ग्लाइकोलको मिसावट नभएको सुनिश्चित गर्न आवश्यक गुणस्तर परीक्षण अनिवार्य गर्दै २०७९ मा नै सूचना प्रकाशित गरिएको बताएको छ ।
यस पश्चात् गत साउन २१ गते डब्लुएचओ कार्य दस्ताबेज बमोजिम मौखिक प्रयोगको लागि तरल तयारीमा इथिलीन ग्लाइकोल र डाइथिलीन ग्लाइकोलको मात्रा परीक्षण गर्न व्यवस्था मिलाउन निर्देशन दिइएको जनाएको छ ।
विभागले सम्बन्धित सबै पक्षलाई यस विषयमा पुनः सचेत रहन निर्देशन दिँदै आवश्यक गुणस्तर परीक्षण गर्न निम्न बमोजिमको निर्देशन पालना गर्न गराउन अनुरोध गरिएको बताएको छ ।
विभागले औषधि उत्पादकका लागि कच्चा पदार्थ खरिद गर्दा आधिकारिक आपूर्तिकर्ताहरूबाट फर्माकोपियल स्तरको मात्र खरिद गर्न, उल्लेखित कच्चा पदार्थ तथा सो समिश्रित झोल बनावटको औषधिको निर्धारित विधि बमोजिम बिथिलिन ग्लाइकोल डाइथिलिन ग्लाइकोलको परीक्षण गरे पश्चात् मात्र उत्पादन तथा बिक्री वितरण गर्न निर्देशन दिएको छ ।
साथै विभागले औषधि आयातकर्ताका लागि नेपालमा आयात हुने उल्लेखित कच्चा पदार्थ मिश्रित झोल बनावटको औषधिको प्रत्येक ब्याचको इथाइलिन ग्लाइकोल डाइइथिलिन ग्लाइकोल मिसावट नभएको सुनिश्चित गरे पश्चात् मात्र आयात तथा विक्री वितरण गर्न निर्देशन दिएको छ । त्यस्तै फार्मेसीहरूका लागि विभागमा दर्ता भएका औषधिहरू मात्र विक्री वितरण गर्न निर्देशन दिएको छ भने चिकित्सकहरूका लागि विभागमा दर्ता भएका औषधिहरू मात्र बिरामीलाई दिन निर्देशन दिएको छ । साथै विभागले दुई वर्ष वा सो भन्दा कम उमेरका बालबालिकाहरूलाई खोकीको औषधि सिफारिस गर्दा वैज्ञानिक प्रमाणको आधारमा मात्र सिफारिस गर्न गराउनु हुन पनि निर्देशन दिएको छ ।
विभागले सर्वसाधारणलाई बालबालिकाका लागि प्रयोग गरिने कुनै पनि औषधि चिकित्सकको सल्लाह बमोजिम मात्र प्रयोग गर्न, विभागमा दर्ता भएका औषधिहरू मात्र प्रयोग गर्न, औषधिको लेबलमा उल्लेखित जानकारी बमोजिम मात्र प्रयोग गर्न अनुरोध गरेको छ ।