२०८२ आश्विन २६ गते, आईतवार

काठमाडौँ । किम जोङ उनले आफ्नो पार्टीको ८०औं वार्षिकोत्सवमा विश्वको सबैभन्दा विनाशकारी क्षेप्यास्त्र प्रदर्शन गरेका छन् ।वार्षिकोत्सवको परेडमा विश्वको सबैभन्दा उन्नत हतियारहरू प्रदर्शन गरिएको थियो, जसमा यसको नयाँ ह्वासोङ-२० अन्तरमहादेशीय ब्यालिस्टिक क्षेप्यास्त्र पनि समावेश थियो, जसलाई किम जोङ उनले ‘सबैभन्दा शक्तिशाली आणविक रणनीतिक हतियार प्रणाली’ भनेर वर्णन गरेका छन् । तस्बिरहरूमा उत्तर कोरियाली राजधानीको सडकमा रंगीन परम्परागत पोशाकमा सजिएका हजारौं मानिसहरू राति अबेरसम्मको कार्यक्रममा भेला भएका, राष्ट्रिय झण्डा फहराउँदै र मुख्य सडकहरूमा गोलीबारीको गर्जनको आवाजमा किम जोङ उनको जयजयकार गरिरहेका देखाइएको थियो ।
सो अवसरमा रूसी सुरक्षा परिषद्का उपप्रमुख तथा राष्ट्रपति भ्लादिमिर पुटिनका नजिकका सहयोगी दिमित्री मेदवेदेव, चिनियाँ प्रधानमन्त्री ली केकियाङ र भियतनामी नेता तो लाम पनि परेडमा उत्तर कोरियाली नेतासँगै उपस्थित थिए । उत्तर कोरियाको आधिकारिक कोरियाली केन्द्रीय समाचार एजेन्सीले जारी गरेको तस्बिरहरूमा यी सबै नेताहरू किम जोङ उनको नजिकै बसेको देखाइएको थियो ।
यसलाई चिनियाँ र रुसी नेताहरूको उपस्थितिमा, उत्तर कोरियाले अमेरिकालाई सिधै चुनौती दिएको रुपमा विश्लेषण गरिएको छ । आफ्नो भाषणमा किम जोङ उनले उत्तर कोरियाली सैनिकहरू रूसी सेनासँगै ‘अन्तर्राष्ट्रिय न्याय’ को लागि लडिरहेको कुरा पहिलो पटक सार्बजनिक रुपमा स्वीकार गरेका थिए । दक्षिण कोरियाका अनुसार युक्रेनसँगको लडाइँमा ६०० भन्दा बढी उत्तर कोरियाली सैनिकहरू मारिएका छन् । परेडमा, उत्तर कोरियाले लामो दूरीको क्रूज मिसाइल, ड्रोन प्रक्षेपण सवारी साधन र जमिनबाट हावामा प्रहार गर्ने मिसाइल प्रणालीहरू सहितको आफ्नो नवीनतम प्रविधि प्रदर्शन गरेको थियो ।
उत्तर कोरियाको राज्य एजेन्सी, केसीएनएले यी हतियारहरूले देशको ‘विशाल रक्षा क्षमता र आश्चर्यजनक प्राविधिक प्रगति’ प्रदर्शन गरेको उल्लेख गरेको छ । आफ्नो भाषणमा किम जोङ उनले भने- ‘हाम्रो अजेय सेनाले सधैं पार्टीको प्रयासलाई दोब्बर बनाएको छ, ताकि देशको उज्ज्वल भविष्य चाँडै प्राप्त गर्न सकियोस् ।’
परम्परागत पोशाकमा सजिएका हजारौं नागरिकहरूले झण्डा फहराए र किम जोङ उन अमर रहुन् ! भन्ने नारा लगाएका थिए । – एजेन्सी