२०८२ कार्तिक १२ गते, मंगलवार

काठमाडौँ । नेपाल कम्युनिस्ट पार्टीले निर्वाचन आयोगमा दल दर्ताको लागि निवेदन दिएको छ । सो पार्टीका प्रवक्ता प्रकाण्ड सीको नेतृत्वमा निर्वाचन आयोग पुगेको टोलीले ‘कम्युनिस्ट पार्टी नेपाल’ नाम राखेर दल दर्ताको लागि निवेदन दिएको हो ।
निर्वाचन आयोगमा दल दर्ताको लागि निवेदन दिएपछि पत्रकार माझ प्रवक्ता प्रकाण्ड सीले आजको दिन नेपालको राजनीतिमा एउटा ऐतिहासिक र विशेष दिन सावित हुने बताए। उनले नेकपाले पहिलोपटक संसदीय प्रणालीमा भाग लिएको दिन भएकाले आजको दिनलाई ऐतिहासिक भएको बताउदै भने- ‘आजको दिन नेपालको राजनीतिमा एउटा ऐतिहासिक र विशेष दिन सावित हुँदैछ। निर्वाचन सहभागी हुने पहिलो दलको अभ्यास हाम्रो पार्टीको विधानमा नयाँ छ । त्यसकारण मैले यहाँ सबैको बीचमा यो दिन ऐतिहासिक हुनेछ भनेको हुँ ।’
प्रवक्ता प्रकाण्ड सीले झण्डै ११ वर्षदेखि नेकपाले देश र जनताको पक्षमा काम गरिरहेको बताउदै जनताको चाहनालाई कुनै अवरोध विना फैसला गर्न पाउने विधि भनेको निर्वाचन नै रहेको बताए । उनले भने- ‘नेपालको राजनीतिक आन्दोलनमा, परिवर्तनको आन्दोलनमा, क्रान्तिको आन्दोलनमा नयाँ दृष्टिकोणसहित नयाँ नीति अघि सारेर हामीले जनताको आफैं अधिकारको कुरा, जनताको मुद्दाको कुरा, सिस्टमको कुरा, चाहनाको कुरालाई आफैं फैसला गर्ने सबैभन्दा प्रजातान्त्रिक विधि र त्यो विधिमा जनतालाई अवरोधबिना फैसला गर्न पाउने विधि भनेको निर्वाचनको विधि हो, हाम्रा विगतका आफ्ना अनुभव पनि छन् । अहिलेको आवश्यकतालाई नीतिलाई जनताको माग अनुसार वस्तुस्थिति अनुसार आफूलाई नयाँ ठाउँमा उभ्याउनुपर्नेछ ।’
यसैगरी, प्रवक्ता प्रकाण्ड सीले जेनजी आन्दोलनपछि परिस्थिति फरक भएको तथ्य प्रस्तुत गर्दै फागुन २१ को निर्वाचनमा भएका जटिलताका बिचमा आफुहरु दल दर्ता गर्न आएको बताए । उनले देश र जनताको आवश्यकता र हितलाई केन्द्रमा राखेर आफुहरु आयोगमा दल दर्ता आएको बताउदै आफुहरु आयोगमा आएर दल दर्ता गर्ने प्रक्रियामा आउनु ऐतिहासिक भएको र यसले निर्वाचन समयमा हुने र देशमा चुनावको माहोल बन्ने बताए ।
यसैगरी, प्रवक्ता प्रकाण्ड सीले जनताले आफ्नो फैसला आफैले गर्ने एउटा विधि निर्वाचन भएकाले नेकपाले निर्वाचनमा भाग लिन खोजेको बताउदै भने – ‘नयाँ दृष्टि अगाडि सारेर जनताको मुद्दा, सिस्टमको कुरा र जनताको चाहनाका कुरा जनता आफैले फैसला गर्ने एउटा प्रजातान्त्रिक विधिमा निर्विरोध फैसला गर्न पाउने विधि निर्वाचन हो । यद्यपि यसमा हाम्रो अनुभव र सीमाहरू छन् । देश र जनताको माग र अहिलेको वस्तुगत नीति अनुसार राष्ट्रिय पार्टीले विकास गर्नुछ नै ।’
यसैगरी, सोहि कार्यक्रममा बोल्दै निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले
आयोगले आगामी फागुन २१ गतेको निर्वाचनमा भाग नलिए राजनीतिक दलहरू मुलुकमा गर्ने राजनीतिक योगदानबाट बहिर्गमन हुने बताए। उनले हाल तोकिएको प्रतिनिधि सभा सदस्यको अग्रिम निर्वाचन अर्थात् परिस्थितिले उब्जिएको निर्वाचन भन्नुपर्ने अवस्था रहेकाे बताउउदै अवस्थालाई विश्लेषण गर्दै जनताको मतबाट हामीले बाहिर रहेर प्रतिस्पर्धा गरेनौ भने मुलुकमा राजनीतिक रूपमा गर्नुपर्ने योगदानबाट बहिर्मुखी हुने बताए । उनले तोकिएको मितिमा निर्वाचन सम्पन्न गर्न आयोगले तीव्र गतिमा काम गरिरहेको र सामान्य भन्दा सामान्य त्रुटिले पनि निर्वाचन बिथोलिन सक्छ भन्ने कुरामा सबैले ध्यान दिनुपर्नेमा जाेड दिदै आयोगले निर्वाचनको मिति घोषणा भएपछि आयोगलाई चुनौती भयो भनेर प्रचार गर्ने गरिए पनि आयोगले त्यो चुनौतीलाई अवसरका ग्रहण गरेको बताए ।
आयुक्त भण्डारीले आयोगले सबै राजनीतिक दलसँग छलफल गर्ने र सुझाव लिने भन्दै सबैको सुझावबाटै आयोग अघि बढ्ने र निर्वाचन गराउने प्रयत्नमा लागेको बताए । उनले देशको वर्तमान राजनीतिक जटिलता समाधानका लागि आयोग आफ्नो संवैधानिक दायित्व पूरा गर्न प्रतिवद्ध रहेको बताए ।
आयुक्त भण्डारीले मुलुक विषम राजनीतिक संकतबाट गुज्रिरहेको उल्लेख गर्दै आउँदो निर्वाचनमा प्रतिष्पर्धामा सहभागि नहुने दलहरु लक्ष्मणरेखाभन्दा बाहिर रहने पनि टिप्पणी गरे । राजनीतिक दलहरूबिच स्वस्थ प्रतिष्पर्धा र लोकतान्त्रिक मर्यादामा रहेर निर्वाचनमा सहभागी हुन सबै दलहरुलाई आग्रह समेत गरे । उनले भने, “हामीसँग अहिले आएको दाियत्वलाई जसरी पनि सम्पन्न गर्ने प्रयोजनको लागि मुलुकको वर्तमान कमजोर स्थितिमा पनि दलहरु प्रतिस्पर्धा गर्न आउँदैनन् भने हामी लक्ष्मणरेखाभन्दा बाहिर रहन्छौं । त्यसकारण मुलुकको संरक्षण गर्नु नै हाम्रो दायित्व भन्ने पवित्र सोच र विचार राखेर निर्वाचन आयोगमा दल दर्ता गर्न आउनुभएको छ यहाँहरुलाई निर्वाचन आयोग र मेरो व्यक्तिगत तर्फबाट पनि हार्दिक स्वागत गर्दछु ।”
आयुक्त भण्डारीले आगामी निर्वाचन प्रक्रियामा नागरिक, राजनीतिक दल, सरकारी निकाय र सञ्चार माध्यम सबैको सक्रिय भूमिका अपरिहार्य रहेको उल्लेख गर्दै स्वच्छ र शान्तीपूर्ण वातावरणमा निर्वाचन सम्पन्न गर्न सरोकारवाल सबैमा आग्रह समेत गरे ।