२०८२ पुष २७ गते, आईतवार

काठमाडौँ । नेपाल कम्युनिस्ट पार्टीनिकट अखिल (समाजवादी)सहित १२ वटा विद्यार्थी संगठनले ब्रिटिश कलेजको अनुमतिपत्र खारेज गर्न माग गरेका छन् । कलेजले हस्पिटालिटी विजनेस म्यानेजमेन्ट लगायत शैक्षिक कार्यक्रमहरू अवैध रूपमा चलाएको, अत्यधिक शुल्क असुलेको, फरक पाठ्यक्रम पढाएको र भर्ना गरिएका विद्यार्थीहरूलाई यूएईमा अलपत्र पारेको विषयमा त्यहाँका विद्यार्थीहरू आन्दोलनरत् छन् ।
संयुक्त विद्यार्थी संगठनहरूको तर्फबाट आइतबार विज्ञप्ति जारी गर्दै पटक-पटक सम्बन्धित निकायलाई समस्याको समाधान खोजेर पीडित विद्यार्थीहरूलाई न्याय दिन दबाब दिँदा पनि उल्टै राज्य संयन्त्रको मिलोमतोमा ब्रिटिश कलेजका सञ्चालकले विद्यार्थीहरूमाथि धरपकड गर्ने र गिरफ्तार गर्ने कार्य भइरहेकोमा आपत्ति जनाएका छन् । उनीहरूले यस्तो हर्कत गर्ने ब्रिटिश कलेजको अनुमति रद्द गरी ठगीधन्दामा संलग्नलाई कानुनी कारवाही गर्न माग गरेका छन् । विज्ञप्तिमा भनिएको छ – ‘विद्यार्थीहरूले समस्या समाधानका लागि आवाज उठाउँदा कलेज प्रशासनले गुण्डाहरु परिचालन गरेर विद्यार्थीलाई धम्काउने, थर्काउने र पीडित विद्यार्थीलाई झुटो र बनावटी मुद्दामा हिरासत पठाउने जस्तो घृणास्पद गतिविधि चलाइरहेकोप्रति संयुक्त विद्यार्थी संगठनको तर्फबाट घोर भर्त्सना र कडा निन्दा गर्दछौं। ’
अनेरास्ववियु, अखिल समाजवादी, अखिल क्रान्तिकारी, समाजवादी विद्यार्थी युनियन नेपाल, समाजवादी विद्यार्थी युनियन, अखिल छैठौं, अखिल (क्रान्तिकारी), वैज्ञानिक समाजवादी विद्यार्थी संगठन नेपाल, अखिल नेपाल विद्यार्थी फेडेरेसन, जनपक्षीय विद्यार्थी युनियन नेपाल, अखिल पाँचौं र अखिल नेपाल विद्यार्थी युनियनले कलेज प्रशासनले विभिन्न हर्कत बन्द नगरे कडा प्रतिरोध गर्ने पनि चेतावनी दिएका छन् ।
विज्ञप्तिमा भनिएको छ – ‘पीडित विद्यार्थीहरूलाई यथाशीघ्र न्याय दिन र विद्यार्थीहरुमाथि ठगीधन्दा चलाउने ब्रिटिश कलेजको अनुमति रद्द गरी विद्यार्थी ठग्ने धन्धामा संलग्न सबैलाई यथाशीघ्र कडा कानुनी कारवाही गर्न प्रहरी प्रशासन, शिक्षा मन्त्रालय लगायत सम्बन्धित निकायलाई जोडदार माग गर्दछौं ।’