२०७१ फाल्गुन २१ गते, बिहीबार

काठमाडौ, २१ फागुन। काठमाण्डुबाट भारतको बनारस जानका लागि आजदेखि सिधा बस सेवा शुरु भएको छ । आज बिहान राजधानीको दशरथ रंगशाला कार्यक्रम गरी काठमाडौ–बनारस मैत्री बस सेवा शुरु गरिंएको हो । बस सेवाको नेपालका तर्फबाट भौतिक पूर्वाधार तथा यातायात मन्त्री विमलेन्द्र निधि र भारतका तर्फबाट त्यहाँको राजमार्ग तथा यातायात मन्त्रालयका सचिव सञ्जय बान्दोपाध्यायले औपचारिक उद्घाटन गरेका हुन् ।नेपाल भारत यातायात सम्झौता अनुसार बस सेवा शुरु भएको हो । सम्झौताको पहिलो चरणमा यसअघि मंसिर ९ गतेदेखि काठमाडौ दिल्ली बस संचालन भइसकेको छ ।
बस सेवाको रुट नयाँ बसपार्कबाट भैरहवाको सुनौली हुँदै बेलिया नाकाबाट गोरखपुर र त्यहाँबाट बनारस पुग्ने र त्यो ६ सय किलोमिटर दुरीको भाडा नेपाली २१ सय ४४ रुपैयाँ लाग्ने पनि मन्त्रालयले जनाएको छ ।