२०७२ बैशाख २१ गते, सोमबार

काठमाडौं, २१ बैशाख । कञ्चनपुरको शङ्करपुर गाविस–७ ढुङ्ग बस्ने खगुदेवी धनाडीले ९० वर्षको उमेरमा नागरिकता पाउनु भएको छ । जिल्ला प्रशासन कार्यालय कञ्चनपुरले ग्रामीण क्षेत्र शङ्करपुरमा सञ्चालन गरेको एकीकृत घुम्ती सेवा शिविरमा उनले नागरिकता पाएको जिल्ला प्रशासन कार्यालयका अधिकृत खेमानन्द पाठकले जानकारी दिनुभयो । वि।स। १९८२ जेठ १७ गते बैतडीमा जन्मनु भएकी धनाडीले वैशाख १९ गते नेपाली नागरिकता पाउनु भएको हो ।
पहाडमा भौगोलिक विकटताका कारण समयमै नागरिक लिन नसकिएको उनका छोरा कासिराम घनाडीले बताउनुभयो । गाउँकै घुम्ती शिविर सञ्चालन भएपछि नागरिकता लिन सहज भएको घनाडीले बताउनुभयो । नागरिकता पाएपछि खगुदेवी हर्षित हुनुभएको छ ।