२०७२ माघ २२ गते, शुक्रबार

काठमाडौं, २२ माघ । नाकाबन्दी र मधेसी मोर्चाको अवरोधका कारण ठप्प रहेको वीरगन्जको रक्सौल नाका केही दिनयता खुकुलो बन्दै गएको छ । नाका सामान्य नभएपनि अवरोधपनि खासै देखिँदैन । अहिले मितेरी पुलमा पुल माथि आन्दोलनकारीको धर्ना, पुल तल कारोबारीको कारोबार चलिरहेको छ ।
यससगै , ठेला र टायर गाडाले भन्सारमा जान सामान्य अवस्था भन्दा ४ गुणासम्म बढी भाडा लिने गरेको वीरगन्जका व्यापारी बताउँछन् । भारतीय रक्सौल कस्टमले मालसामानको जाँचपास सुचारु गरेपछि तुलनात्मक रुपमा आयात बढेको वीरगञ्ज भन्सार कार्यालयले जनाएको छ । भन्सारका प्रवक्ता सुशील शर्माले मालसामान आउने क्रम बढेपछि राजश्व असुली पनि वृद्धि भएको बताए । नाकाबन्दी भएका बेला दैनिक ४ लाख रुपैयाँसम्ममा झरेको राजश्व अहिले ५० लाख भन्दा माथि पुगेको प्रवक्ता शर्मा बताउँछन् ।