२०७२ माघ २३ गते, शनिबार

काठमाडौं, २३ माघ । १ सय ३५ दिनपछि खुलेको वीरगन्ज–रक्सौल नाका शनिबार पुनः बन्द गर्न मितेरी पुलमा गएका मधेसी मोर्चाका नेता तथा कार्यकर्तालाई स्थानीयबासिन्दाले लखेटेका छन् । मितेरी पुलमा नारा लगाउन खोज्दा भारतीय ढुवानीकर्ता र स्थानीयले विरोध जनाएपछि केहीबेर झडप भएको थियो । १० मिनेटको झडपपछि मधेसी मोर्चाका कार्यकर्ता फर्किएका थिए । सीमानाका बन्द गराउन सघाउँदै आएको भारतीय पक्ष पनि नाका खुलाउन तयार भएपछि अवरोध हटेको हो । अवरोध हटेपछि विभिन्न सामग्री बोकेका मालबाहक सवारी–साधन सीमा नाकाबाट आवतजावत गरिरहेका छन् । रक्सौलतर्फ रोकिएका मालबाहक गाडी भित्रिएर वीरगन्ज भन्सार कार्यालय भरिभराउ भएको छ ।