२०७२ माघ २८ गते, बिहीबार

काठमाडौं, २८ माघ । चितवनको नारायणगढ-मुग्लिन खण्ड आजदेखि हरेक दिन बिहान ११ बजेदेखि दिउँसो ३ बजे बन्द गरिने बताइएको छ । सडक बिस्तार भैरहेकाले बिहान ११ बजेदेखि दिउँसो ३ बजेसम्म गाडीहरु मुग्लिन र जुगेडीमा रोकिने भएका छन । ‘दुई घण्टा पहाड फोर्ने र दुई घण्टा सफा गर्ने काम हुने भएकाले आजदेखि हरेक दिन ४ घण्टा सडक बन्द हुन्छ,’ सडक आयोजनाका इन्जिनियर शिव खनालले भने ।
अत्यावश्यक सेवाका गाडीहरुलाई पनि २ घण्टाको फरकमा छाडिने जिल्ला ट्राफिक प्रहरी कार्यालय चितवनले जनाएको छ । नारागणगढ-मुग्लिन सडक खण्डमा दैनिक आठ हजारभन्दा धेरै गाडीहरु आवत-जावत गर्छन् । जिर्ण र साँघुरो भएकाले सो सडकखण्डमा अत्यधिक दुर्घटना हुने गर्दछ । सडक फराकिलो पार्ने काम भैरहेकाले पश्चिम तर्फ जाने गाडीहरुलाई सिद्धार्थ राजमार्ग र पूर्वतर्फ जाने गाडीहरुलाई त्रिभुवन राजपथलाई विकल्पको रुपमा प्रयोग गर्न सुझाइएको छ । आँपटारीदेखि मुग्लिनसम्मको ३४ किलोमिटर सडकलाई सन् २०१७ अपि्रलसम्ममा बिस्तार गरेर चार लेनको बनाउने काम भइरहेको छ । खुला क्षेत्रमा ११ मिटर र पहाडी चट्टानयुक्त क्षेत्रमा ७ मिटर चौडाइको सडक बनाइने छ । यो कामका लागि आर्थिक वर्ष ०७०/७१ को बजेटमा ३ अर्ब रुपैयाँ विनियोजन गरिएको छ । आँपटारीदेखि झण्डै १३ किलो मिटरसम्मको खण्ड बिएलए तथा श्रेष्ठ निर्माण कम्पनीले र त्यसपछिको २३ किलोमिटर सडक बिस्तारको जिम्मा उड हिल तथा लामा निर्माण कम्पनीलाई ठेक्का दिइएको छ ।