प्रधानमन्त्री दाहाल गोवामा

२०७३ आश्विन २९ गते, शनिबार

काठमाडौं, २९ असोज । भारतको गोवामा हुन लागेको ब्रिक्स सम्मेलनमा भाग लिन प्रधानमन्त्री पुष्पकमल दाहाल शनिबार दिउँसो गोवा आइपुगेका छन् ।
सम्मेलनमा भाग लिन शनिबारै उनी नेपाल वायुसेवा निगमको जहाजबाट १८ सदस्यीय नेपाली प्रतिनिधिमन्डलको नेतृत्व गर्दै भारतको नयाँदिल्ली हुँदै गोवा आइपुगेका हुन् ।
उनलाई नयाँदिल्लीस्थित इन्दिरा गान्धी अन्तर्राष्ट्रिय विमानस्थलमा भारतका लागि नेपाली कार्यबाहक राजदूत कृष्णप्रसाद ढकाल तथा गोवामा भारतीय विदेश राज्यमन्त्री एमजे अकबर र नेपालका लागि भारतीय राजदूत रणजीत रायले स्वागत् गरेका थिए ।
सम्मेलनकाक्रममा गोवामा रहँदा प्रधानमन्त्री दाहालले शनिबारै चिनियाँ राष्ट्रपति सी जिन पिङ र आइतबार भारतीय समकक्षी नरेन्द्र मोदीसँग द्विपक्षीय वार्ता गर्नेछन् ।
प्रधानमन्त्री दाहालले बिमस्टेक सदस्य राष्ट्रका राष्ट्र/सरकार प्रमुखको बैठक एवं ‘ब्रिक्स विमस्टेक आउटरिच सम्मेलन’लाई सम्बोधन गर्नेछन् ।
सम्मेलनबाट ब्रिक्सलाई संस्थागत गर्ने, विगतका समझदारी कार्यान्वयनमा लैजाने, ब्रिक्स संयन्त्रलाई एकताबद्ध गराउने, सहकार्यका लागि नयाँ अध्यायको खोजी गर्ने र संस्थागत क्रियाकलापलाई निरन्तरता दिनेजस्ता निर्णय हुने अपेक्षा गरिएको छ ।
त्यसैगरी, प्रधानमन्त्री दाहालको रुसका राष्ट्रपति भ्लादिमिर पुटिन, श्रीलंकाका राष्ट्रपति मैत्रीपाल श्रीसेना, दक्षिण अफ्रिकाका राष्ट्रपति जाकोब जुमा, ब्राजिलका राष्ट्रपति मिसेल टेमर र भुटानका प्रधानमन्त्री छिरिङ तोब्गेसँग द्विपक्षीय भेटघाट हुने बताइएको छ । – कृष्ण अधिकारी (रासस)

प्रतिक्रियाहरु

[anycomment]