२०७३ माघ २ गते, आईतवार

काठमाडौं, २ माघ । आज राष्ट्रिय भूकम्प सुरक्षा दिवस । नेपालमा प्रत्येक वर्षको माघ २ गते यो दिवस मनाउने गरिन्छ । विसं १९९० माघ २ गते नेपालमा गएको महाभूकम्पको सम्झनामा विसं २०५५ सालदेखि भूकम्प सुरक्षा दिवस मनाउन थालिएको हो ।
यद्यपि, यसबीचमा नेपालमा गएका ठूला साना थुपै्र भूकम्पले धनजनमा ठूलो क्षति पुर्‍याएको छ । गत वर्ष बैशाख १२ गते गएको अर्को ठूलो भूकम्पले पुर्‍याएको क्षतिबाट मुलुक अझै सम्हालिन सकेको छैन । हजारौं नागरिकको मृत्यु, हजारौंहजार अंगभंग र घाइते तथा लाखौंलाख नागरिक एकसाथ घरवारविहीन बनाएको २०७२ साल बैशाख १२ को भूकम्पपछिको पुननिर्माणले अझै गति लिन सकेको छैन । पुनर्निर्माण प्राधीकरणमा भइरहेको दलीयकरणले वास्तविक पीडितसमक्ष राज्यको उपस्थिति हुनै सकेको छैन । भूकम्प गएको दुई वर्ष हुन लाग्दा पनि प्रभावितलाई दिइने भनिएको अनुदान रकमको पहिलो किस्तानै सबैमा पुगेको छैन । सुस्त र गतिहीन प्रशासन एवं अतिराजनीतिकरणले पुनर्निर्माणको काम प्रभावित बनेको हो ।
यद्यपि, यस वर्ष ‘भूकम्पीय सुरक्षाको बलियो आधार, भैंचालो थेग्ने घर र भौतिक पूर्वाधार’ भन्ने सन्देशका साथ आज १९ औं भूकम्प सुरक्षा दिवस मनाईंदैछ ।
काठमाडौंको साँखुमा यससम्बन्धि मूख्य कार्यक्रम गरिने भूकम्प सुरक्षा दिवस मूल समारोह समितिले जनाएको छ । साँखुमा पाँच दिनसम्म भूकम्पीय सुरक्षासम्बन्धी प्रदर्शनी गर्नुका साथै सडक नाटक र जनचेतनामूलक अभियान सञ्चालन गरिने जनाइएको छ । यसक्रममा प्रदर्शनीमा २२ कक्ष राखिने छ ।