२०७३ चैत्र ९ गते, बुधबार

काठमाडौं, ९ चैत । बेलायतले विद्युतीय सामान लिएर विमानमा चढ्न नपाउने नियम लागु गर्ने भएको छ । अमेरिकाले जस्तै बेलायतले पनि मध्य पूर्व र उत्तर अमेरिकी देशबाट क्याबिन ब्यागमा ल्यापटप, ट्याबलेटसहितका विद्युतीय सामग्री राखेर विमान चढ्न नपाउने नियम लागु गर्न लागेको हो । बेलायतले टर्कीबाट विद्युतीय सामान बोकेर विमान चढ्न नपाउने नियम लागु गरेको बीबीसीले जनाएको छ । स्मार्टफोनभन्दा ठूलो आकारका इलेक्ट्रोनिक्स सामान बोकेर विमान चढ्न नपाउने नियम अमेरिकाले लागु गरेलगतै बेलायतले पनि यस्तै नियम अनुसरण गर्न लागेको हो । अब टर्की, लेबनान, जोर्डन, इजिप्ट ट्युनिसिया र साउदी अरेबियाबाट हुने उडानमा यात्रुले ल्यापटपसहितका सामान बोक्न पाउने छैनन् । बेलायतको प्रतिबन्ध विभिन्न १४ एयरलाइन्समा लागु हुने जनाइएको छ ।
अमेरिकाका विभिन्न १० विमानस्थलमा सेवा दिँदै आएका नौ वटा एयरलाइन्स यो नियमबाट प्रभावित हुने छन् । टर्की सरकारले भने प्रतिबन्ध गलत भएको भन्दै निर्णय फिर्ता लिन माग गरेको छ । उता, क्यानडाले पनि विमानमा इलेक्ट्रोनिक्स सामान बोक्न नपाउने नियम लागु गर्ने तयारी गरेको बताइएको छ । – एजेन्सी