२०७४ चैत्र २६ गते, सोमबार

काठमाडौं, २६ चैत । प्रहरीले गरिब तथा विपन्न बालबालिकालाई पढाइदिने प्रलोभन देखाउँदै लामो समयदेखि बाल यौन दुराचार गर्दै आएको आरोपमा ६० वर्षीय क्यानाडेली नागरिक पिटर जोन डालगिल्सलाई पक्राउ गरेको छ । काभ्रेको मन्डनदेउपुर नगरपालिका १ मा करिब १४ रोपनी जग्गामा विलासी भिल्ला बनाएर बाल यौन दुराचार गरेको आरोपमा नेपाल प्रहरीको केन्द्रीय अनुसन्धान ब्युरोले डालगिल्सलाई पक्राउ गरेको हो ।
दुई वर्षदेखि पटकपटक नेपाल आउने गरेका उनले हिमालयन कम्युनिटी फाउन्डेसन नामक संस्था खोली विपन्न तथा गरिब वर्गका बालबालिका पढाइदिने गरेको खुलेको छ । प्रहरी अनुसन्धानमा १५ जनाभन्दा बढी बालकलाई बालयौन दुराचारमा लगाएको खुलेको छ । –कान्तिपुर दैनिकबाट