तिमीले ऐना हेर्न छोडेको कति भयो ?– बलराम तिमल्सिना
२०७६ बैशाख १ गते, आईतवार
जुन दिन तिमीले
भ्रष्टाचारीसँग अङ्कमाल गर्यौ
र चुप्प गालामा म्वाइँ खायौ
हो त्यही दिन हो
तिम्रो इमानमा दाग लागेको !
जुन दिन तिमीले
दलाललाई लाल भन्यौ
र गद्दारलाई सलाम ठोक्यौ
हो त्यही दिन पोतिएको हो-
तिम्रो अनुहारमा मोसो !
जुन दिन तिमीले
नाङ्गै हिडेको वादशाहलाई
समाजवादी पहिरनमा छ भन्यौ
र वादशाहको गलामा
एक पसेरीको माला पहिर्यायौ
हो त्यही दिन हो
तिम्रो पनि कट्टु खुस्किएको
र तिमी नाङ्गै बनेको !
जुन दिन तिमीले
प्रश्नहरू सुनेर राता आँखा पार्यौ
र परक्क मुन्टो बटार्यौ
जुन तिमीले
व्यवहारिक हुने नाममा
कमिशन ग्रहण गर्यौ र मुस्कुरायौ
हो त्यही दिनबाट हो
तिमी कमरेडबाट खसेको !
हामीलाई
सोमत सिकाउँदै हिड्ने
ए भूतपूर्व कमरेड
तिमीले ऐना हेर्न छोडेको कति भयो ?
