सीमा – बलराम तिमल्सिना
२०७७ बैशाख २६ गते, शुक्रबार
मलाई हरेक सीमाहरू
अगाडि उभिएको दुश्मनजस्ता लाग्छन् !
दुश्मनले पनि भन्छ –
अगाडि नबढ नत्र जे पनि हुन्छ
सीमाले पनि भन्छ-
तेरो रगरग यहींसम्म हो !
मलाई सीमा र दुश्मन एउटै लाग्छ
मलाई दुश्मन र सीमा एउटै लाग्छ !
दुश्मनलाई जित्नु भनेको
सीमा पार गर्नु हो
सीमा पार गर्नु भनेको
दुश्मनलाई जित्नु हो !
मलाई सीमा पार गर्न मजा लाग्छ
मलाई दुश्मनलाई जित्न मजा लाग्छ !
जातका सीमा
धर्मका सीमा
परम्परा र रीतिका सीमा
ज्ञानका सीमा विज्ञानका सीमा
देशका सीमा महादेशका सीमा
यी सबै सीमाहरू
उलङ्घन गर्नु छ मैले !
मलाई सीमाहीन बनेर फैलिनु छ
मलाई सीमा र दुश्मन एउटै लाग्छ !
राज्यका सीमा
कानूनका सीमा
अधिकारका सीमा
कर्तव्यका सीमा
सपना, सोच र कल्पनाका सीमा
आवेग, उत्तेजना र आक्रोशका सीमा
प्रेम, भावना र बिचारका सीमा
वाद, प्रतिवाद र संवादका सीमा
लाज, डर र उत्सुकताका सीमा
मैले सारा सीमाहरू नाघ्नु छ
मैले सीमा-शासित जिन्दगी त्याग्नु छ !
दुखका सीमा, सुखका सीमा
हर्षका सीमा, विस्मातका सीमा
मनोरञ्जनका सीमा ,यातनाका सीमा
मित्रताका सीमा, दुश्मनीका सीमा
एकताका सीमा, संघर्षका सीमा
मैले सारा सीमाहरू भत्काउनु छ
मलाई सीमाहीन जिन्दगी वाँच्नु छ !
आऊ दुश्मनहरू हो आऊ
आऊ सीमाहरू हो आऊ
म तिमीहरूलाई जित्न चाहन्छु
म तिमीहरूलाई पार गर्न चाहन्छु !
