२०७८ भाद्र ७ गते, सोमबार

काठमाडौँ । स्वास्थ्य सेवा विभागको बाल कल्याण तथा खोप महाशाखाले अफगानिस्तानबाट उद्धार गरेर ल्याइएका नेपाली नागरिकलाई त्रिभुवन विमानस्थलमा पोलियो खोप लगाइने जनाएको छ । महाशाखाले नेपालमा ५ वर्षमुनिको बालबालिकालाई मात्र पोलियो खोप लगाइने गरेकामा अफगानिस्तान पोलियोको जोखिम रहेको देश हुनाले त्यहाँबाट उद्धार गरिने सबै नागरिकलाई पोलियो खोप लगाउन लागिएको बताएको छ ।
संयुक्त राष्ट्रसंघका अनुसार विश्वमा हाल अफगानिस्तान र पाकिस्तानमा प्रत्येक वर्ष पोलियोका बिरामी फेला पर्ने गरेका छन् । यो वर्ष दुई जनामा पोलियो फेला परेकोमा एकजना पाकिस्तानी र अर्को अफगानिस्तानी नागरिक हुन् ।

तालिवानले अफगानिस्तानको राजधानी काबुल नियन्त्रणमा लिएपछि नेपाललगायत विभिन्न मुलुकका नागरिकहरु अहिले स्वदेश फर्किरहेका छन् । गृहमन्त्रालयका अनुसार गत भदौ १ गते यता ५ सय भन्दा बढी नेपाली अफगानिस्तानबाट नेपाल फर्किएका छन् ।
यसअघि अफगानिस्तानबाट फर्किएकाहरुलाई भने उनीहरुलाई पायक पर्ने स्वास्थ्य संस्थामा पोलियो खोप लगाउने व्यवस्था मिलाउन निर्देशन दिइसकेको मन्त्रालयले जनाएको छ ।