अब एकता हुन्छ रे ।
ताराबहादुर बुढाथोकी
२०७९ भाद्र १४ गते, मंगलवार
ऊ यता आउँछ रे,
यो उता जान्छ रे ।
उता सभापति पाउँछ रे,
यता महासचिव खान्छ रे ।
फलानाको भाषणले
मोहोनी लाउँछ रे,
तिलानाको गितले
जनताको मन तान्छ रे ।
गाँठो बन्धनले उत्तानो पार्छ रे,
त्यसैले अब एकता हुन्छ रे ।
चुनावमा फलानाले दोब्बर झार्छ ।
फलानाको गोबर झार्छ रे ।
अब चुनाव आउँदैछ ।
–––––––––
जितेको बेला
एकार्काको छाला काड्नेहरु,
एकार्काका छातीमा कुहिना र
घुँडा गाड्नेहरु ।
मौका पर्दा भदौमा तोरी खोज्नेहरु !
लाससँग पनि जोरी खोज्नेहरु !
पखाल्न .सम्म पखालेर
साबुनको झोल छोड्नेहरु
ब्वाँसाको दाँत गाडेर
भेडाका छालाको खोल ओड्नेहरु !
सौताको रिसले आफ्नो घर जलाउनेहरु,
तिखो नक्सा बाहिर देखाएर,
लोकतन्त्रका पिल्लर ढलाउनेहरु ।
एउटा हिँडेको बाटो गन्हाउनेहरु,
चिता बनाउने र चिहान खनाउनेहरु !
अब एकता गर्छ अरे,
उनीहरुले भनेको पत्याउनै पर्छ अरे ।
––––––––––
गोहीहरु छेपारासँग मिले,
छुचुन्द्राहरु गन्ध दलेर बिरालासँग मिले ।
सत्ता रत्यौलीको राँगो भयो,
प्रतिपक्ष कात्तिकको डाँगो भयो ।
कुकुर भुक्तैछ, पिना सुक्दैछ ।
बिजुली चम्किँदैछ हात्ती लम्किँदैछ ।
एमसीसी पास हुन्छ, प्रतिपक्ष ट्वाँ पर्छ ।
नागरिकता बिधेयक आउँछ,
प्रतिपक्षी ग्वाँग्वाँ गर्छ ।
मुसो तार खान्छ, धपाउँछ, बाहिर जान्छ,
भित्र आउँछ र सत्ता समाउँछ ।
प्रतिपक्षी ह्वाँह्वाँ रुन्छ ।
बिरोध हुन्छ, आगो बल्छ फेरि सामसुम हुन्छ ।
आरोप लाग्छ, च्युत हुन्छ, फेरि थामथुम हुन्छ ।
मु…हरुले न देशको स्वाभिमान बचाए,
न ऐन, कानून र संविधान बचाए ।
फेरि एकता गर्ने रे,
देशको मुहार फेर्ने रे !
जनताले पत्याइदिनु पर्ने रे ।
––––––––––
सक्छौ भने
प्रदेश खारेज गर्छु भनेर आउ,
होलिवाइन खानु भन्दा बरु मर्छु भनेर आऊ,
धर्मको रक्षा गर्छु भन,
स्वास्थ्य र शिक्षा राज्यले जिम्मा लिन्छु भन,
नबिकेको साग सरकारले किन्छु भन ।
भ्रष्टाचारीलाई बाँधेर लडाउँछु भन,
रोजगारीलाई बढाउँछु भन ।
स्कुलमा किताब लान्छु भन,
खेतमा मल लान्छु भन,
प्रत्यक्ष कार्यकारी बनाउछु भन,
पारदर्शी कर्मचारी बनाउँछु भन ।
समानुपातिक हटाइदेऊ,
टट्टुलाई रिकलबाट घर पठाइदेऊ ।
यति गर्न सक्ने भए आउँदा भो,
डोकोजत्रो मुख बाउँदा भो ।
नत्र देश लुट्न र हाम्रो दिमाग भुट्न,
जुटेर आऊ कि फुटेर आऊ !
उठेर आउ कि कट्टु …तेर आऊ ।
तिमी मु….हरुले केही गर्न पनि सक्दैनौ,
देश त अधमरो पार्छौ पार्छौ,
आपूm पनि स्वाभिमान बाँच्न सक्दैनौ,
खुट्टा तानेर मर्न पनि सक्दैनौ ।
भुत्राको एकता–भुत्राको गाँठबन्धन ?
