२०७० चैत्र २८ गते, शुक्रबार

काठमाडौ, २८ चैत। नेकपा–माओवादी इलामको आज सम्पन्न प्रथम जिल्ला अधिवेशनले सरिता राईलाई (सिन्धु) जिल्ला सचिवको जिम्मेवारी दिई नयाँ साङ्गठानिक संरचना तयार गरेको छ ।माओवादीले जिल्ला इञ्चार्जको संरचना हटाएर युद्धकालीन संरचना तयार पारेको हो । यस्तै १५० सदस्यबाट घटाएर ५० सदस्यीय जिल्ला कार्यसमिति गठन गरिएको छ । पद मात्र ओगट्ने जिम्मेवारी वहन नगर्ने प्रवृति भएकाले सबैलाई घटुवा गरिएको र समितिबाट समेत हटाइएको जिल्ला प्रवक्ता अशोक प्रधानले बताए ।
जिल्ला समितिमा शान्ता बस्नेत, अशोक प्रधान, पवन शङ्कर, राज राई, होम खतिवडा, रूपनारायण अधिकारी, राजेश चाम्लिङ, सुमनसिंह पौडेल, हिमाल रोका, डकेन्द्र लिम्बू, तुला लावती, निशान मगर, धनप्रसाद राईलगायत रहेका छन् । पार्टीको केन्द्रीय नीतिअनुसार अहिलेको साङ्गठानिक संरचनाअनुरूप सचिवलाई मात्र महत्वपूर्ण जिम्मेवारी दिइएको प्रधानले जानकारी दिए ।
पचास सदस्यमध्येबाट एकतिहाइको सचिवालय सदस्य र पाँच जनाको कार्यालय सञ्चालन टोली गठन हुने नेकपा–माओवादी इलामले जनाएको छ । पहिले जिल्ला समितिमा रहेका केही सदस्यलाई लिम्बूवान राज्य समितिमा लगिने बताइएको छ ।