म ऐया आत्था गरिरहें – बलराम तिमल्सिना
२०७७ जेष्ठ १८ गते, आईतवार
म ऐया आत्था गरिरहें
तिमी मुसुमुसु हाँसी हेरिरह्यौ !
उत्पीडनमा मुसुमुसु हाँस्ने
तिमी गौतम वुध्द कसरी भयौ ?
म ऐया आत्था गरिरहें…..!
म गुहार लगाई रोइरहें
तिमी उल्टै मलाई टोकसिरह्यौ !
यस्तो विवेक मरेको मान्छे
तिमी न्यायधिश कसरी भयौ ?
म ऐया आत्था गरिरहें…!
म हजार पल्ट चिमोटिएँ
म हजार पल्ट निमोठिएँ
म हजार पल्ट लखेटिएँ
म हजार पल्ट पछारिएँ
मेरो दलन मेरो जलन सब
तिमी मात्रै टुलुटुलु हेरिरह्यौ
यस्तो मूर्तीजस्तो मान्छे
तिमी सामाजिक कसरी भयौ ?
म ऐया आत्था गरिरहें…..!
लुटको भाग हरेक पटक
लुसुक्क बसेर खाइरह्यौ
चीरहरणमा सँधै तिमी
दर्शक बन्न आइरह्यौ
तिम्रो जुवाको खालमा
मलाई च्याँखे थापिरह्यौ
यस्तो जुवाडे छुसी तिमी
धर्म युधिष्ठिर कसरी भयौ ?
म ऐया आत्था भनिरहें….
