तिमी भन्छौ–

बन्दुकले देश बन्दैन

तिमी भन्छौ–

बन्दुकले मन बदलिदैन

बन्दुकले मान्छे बदलिदैन

बन्दुकले समाज बदलिदैन

एक छिनको लागि

ठिक छ तिम्रो कुरा मानिदिउँला

लौ मलाई एउटै उदाहरण देऊ न त

बन्दुकको सहारा नलिई

संसारमा कुन एउटा देश बन्यो ?

बन्दुकको मद्दत नलिई

कुन देश एक मिनेट टिक्यो ?

बन्दुकको सहगोग नलिई

कुन आततायी सत्ता ढल्यो ?

बन्दुक नपड्काई

कुन इतिहासमा क्रान्ति भयो ?

आजको शक्तिसाली अमेरिका

कुन पूmलको खेती गरेर बनेको हो ?

आजको विशाल भारत

कुन मन्त्रको जादूले जन्मेको हो ?

हाम्रै एक थान फुच्चे देश

कुन गीत गाएर जितौरी आएको हो ?

मलाई बन्दुक विना टिकेको

कुनै एउटा सत्ता त देखाइदेऊ !

चोरले चोरको मन त जित्ला

सज्जनले सज्जनको पनि मन जित्ला

भोकाले भोकाको मनको भाषा बुझ्छ

नाङ्गाले नाङ्गाको ढुकढुकी छाम्न सक्छ

मनको भाषा बुझ्नेले त मन बदल्न सक्ला

जसलाई अर्कोको मनको भाषा नै आउँदैन

उसले अर्कोलाई कसरी बदल्छ होला ?

हजारौं बन्दुकहरूको घेरामा

बुलेटप्रुफ गाडीमा चढेर

तिमी भन्छौ–

बन्दुकका कुरा नगर

बिद्रोहका कुरा नगर

प्रेम र सद्भावले मान्छे बदल्ने कुरा गर

यो त अति भएन र महाशय ?

मलाई पनि रहर छ

यो धरतीलाई बन्दुक विहिन बनाऊँ

हामीले सास फेर्ने हावामा

बारुदको धुवाँ नमिसाऊँ

मृत्युको खेती नगरौं

कसैको हत्यामा उत्सव नमनाऊँ

ए बन्दुकको बिरोध गर्ने महाशय

तिमी साँच्चै इमान्दार छौ भने

आऊ संसारबाट बन्दुक हटाउने घोषणा गरौं !

मलाई पनि थाहा छ

बन्दुक साधन मात्र हो

बन्दुक मान्छेले चलाउँछ

मान्छे विचारले चलाउँछ

तर

खास विचार बोकेको मान्छेले

जब बोक्छ बन्दुक

त्यसपछि त्यो

आफैँ एउटा विचार बन्न पुग्छ !