अमेरिकी दिमाग
२०७८ फाल्गुन २२ गते, आईतवार
अमेरिकामा मात्र हुँदैन अमेरिकी दिमाग
त्यो युरोपमा हुन्छ
ल्याटिन अमेरिका
अफ्रिका र एशियामा पनि हुन्छ !
अमेरिकी दिमाग हुन
गोरो छाला
कुहिरा आँखा
र कैलो कपाल नै खाँचो पर्दैन
त्यो त
कालो या गहुँगोरो छाला
अनि
घँघुरिएको
या सपक्क मिलेको
कालो कपाल हुनेसँग पनि हुन्छ !
अमेरिकी दिमाग हुन
अमेरिकी नागरिकता
अमेरिकी पिआर
या अमेरिकी नातेदार हुनु पर्दैन
अमेरिकासँग
गोरु बेचेको साइनो नहुनेसँग पनि
गजबको अमेरिकी दिमाग हुन सक्छ ।
अमेरिकी दिमाग हुन
फरर अंग्रेजी बोल्न जान्नु पर्दैन
ए फर एप्पल नजान्नेसँग पनि
काइदाको अमेरिकी दिमाग हुन सक्छ ।
अमेरिकी दिमाग हुन
सर्ट–पाइन्ट
कोट र टाई पनि लगाइरहनु पर्दैन
दौरा सुरुवाल र ढाका टोपी
चौबन्दी र सारी
या धोती कुर्ता र गम्छामा लगाए पनि
अच्छाको अमेरिकी दिमाग बन्न सक्छ ।
अमेरिकी दिमाग हुन
अमेरिकी झण्डा नै बोक्नु पर्छ भन्ने छैन
अमेरिकी राष्ट्रिय गान नै गाउनु पर्दैन
हातमा चन्द्र सूर्य वाला झण्डा
र मुखमा ‘सयौं थुङ्गा पूmलका हामी’
हुनेहरू भित्र पनि
लुकेर बस्न सक्छ अमेरिकी दिमाग ।
अमेरिकी दिमाग हुन
जयमसी नै भन्नु पर्छ भन्ने छैन
जय सीता–राम
बुद्धम् शरणम् गच्छामी
या अल्लाहको नाम लिनेभित्र पनि
अमेरिकी दिमाग भैदिन सक्छ ।
कहिले खान पान बनेर
कहिले नाचगान बनेर
कहिले दान र अनुदान बनेर
अमेरिकी दिमाग
हर्दम आइरहन्छ
र हाम्रो स्वत्वहरण गरिरहन्छ ।
