२०८२ भाद्र १३ गते, शुक्रबार

         

  - हस्तबहादुर केसी 

लिपुलेक
तिमी हाम्रो आमा हौँ
लिपुलेक ‍
तिमी हाम्रो मुटु हौँ
लिपु लेक
तिमी हाम्रो आस्था हौँ
लिपुलेक
तिमी हाम्रो विश्वास हौँ
लिपुलेक तिमी
हाम्रो प्राण
लिपुलेक
तिमी हाम्रो जीवन हौँ
लिपु
तिमी भन या नभन
आज
तिम्रो मुटुमा घाऊ लागेको छ
लिपुलेक
आज
तिम्रो छातिमाथि
दुईवटा ठूला चिलहरुले
तिम्रो छाति लिछोरीरहेका छन्
तिनका ती
तिखा नङ्ग्राहरुले
तिम्रो मुटु चिथोरीरहेका छन्
प्रिय लिपुलेक
तिमी आज एक्लै छैनौ
तिम्रो साथमा
तीन करोड नेपाली छन्
तिम्रो मुटुभित्र लागेको घाऊ
आज तीन करोड नेपालीको
मुटुमा लागिरहेको छ
त्यसैले
तिमीले बाँच्ने आँट मात्र गर
साथमा तीन करोड नेपाली छौं
किनकि तिम्रो जीवन नै
हाम्रो जीवन हो
तिम्रो हाम्रो
मुटुभित्र चह्र्याइरहेको
घाऊलाई निको पार्ने
एउटामात्र आौषधिछ
राष्ट्रिय स्वाधीनताको लडाइँ
राष्ट्रिय स्वाभिमानको लडाइँ
राष्ट्रिय गौरवको लडाइँ
धैर्य होऊ लिपुलेक
प्रिय लिपुलेक
तिम्रो मुटुभित्र
बज्रिएको घाऊमा
मलम अगाउँने
एक मात्र ओखती छ
त्यो हो
राष्ट्रिय स्वाधीनताको लडाइँ
त्यसैले
राष्ट्रिय स्वाधीनताको
ज्वारभाटा
सृष्टि हुने बेलासम्म
धैर्य गर प्रिय लिपुलेक
हो त्यो दिन आउँछ
त्यो सुनौलो दिन ल्याउनु पर्छ ।
सबै देशभक्त
नेपाली मिलेर
अनि
त्ससपछि मात्र
स्वाधीनताको गीत गाउँला
राष्ट्रिय मुक्तिको गीत गाउँला
छाती खोलेर ।