२०७१ बैशाख १८ गते, बिहीबार

काठमाडौं,१८ वैशाख । पेट्रोलियम पदार्थ चोरीको विषयलाई लिएर नेपाल आयल निगमले १९ वटा ट्यांकरहरुसंग करार सम्झौता निलम्बन गरेको छ ।
पेट्रोलियम पदार्थ निगममा बुझाउनु अघि चोरी, साटफेर जस्ता चुहावटको काममा संलग्न भएको पाइएकाले इन्डियन आयल कर्पोरेशनको बेतालपुर डिपोदेखि निगमको रुपन्देही भलवारी डिपोसम्म पेट्रोलियम पदार्थ ढुवानीमा संलग्न रहेका ट्यांकरहरु संगको सम्झौता रद्द गरिएको निगमले जनाएको छ ।
ती ट्यांकरका चालक र सहचालकलाई निगम अन्तर्गतको कुनै पनि पेट्रोलियम पदार्थ ढुवानीको काममा संलग्न हुनबाटसमेत निगमले रोक लगाएको छ ।
यस्तै निगमका ढुवानीकर्ता मार्कण्डेयप्रसाद कसौधनको नाममा रहेको निगमको करारमा सञ्चालित ट्यांकरले थानकोट डिपोमा ल्याएको पेट्रोल निगमले गुणस्तर जाँच गर्दा मिसावट गरेको पाइएकाले ३ महिनाका लागि ढुवानी गर्न रोक लगाइएको पनि निगमले जनाएको छ ।