२०७२ फाल्गुन ३ गते, सोमबार

काठमाडौं, ३ फागुन । नेपाल आयल निगमले उपभोक्तालाई लाइनमा नराखीकनै माग अनुसार इन्धन वितरण गर्ने तयारी भइरहेको बताएको छ । निगमका प्रवक्ता मुकुन्द घिमिरेले अब बिस्तारै आयात बढ्न थालेकाले यही हप्ताभित्र पेट्रोल र डिजेलको वितरण सहज हुने बताए । तोकिएको पम्पबाट समेत इन्धन भर्न नपाएको उपभोक्ताले गुनासो गरिरहँदा निगमले अवस्था सहज बनाउने प्रयास भइरहेको बताएको हो । निगमका अनुसार सोमबार काठमाडौंमा ६ सय किलो लिटर पेट्रोल र यही परिमाणमा डिजेल पठाउने तयारी भइरहेको छ ।
विभिन्न नाका भएर भने दैनिक ३ सय किलोलिटर तेल मात्रै काठमाडौं भित्रिएको छ । निगमसँग स्टकमा रहेको १५ लाख लिटर पेट्रोलबाटै अहिले वितरण थालिएको हो । निगमका अनुसार आइतबार रक्सौल नाकाबाट ११ सय किलोलिटर तेल लोड भएको र यो काठमाडौं आउने क्रममा छ । शनिबार भारतीय आयल कर्पोरेशनले लोड नगरिदिदा माग अनुसारको बजारमा पठाउन नसकेको निगमले जनाएको छ । तेलको सहज वितरणका लागि रक्सौलबाट दैनिक २४/२५ सय किलोलिटर तेल आवश्यक पर्छ ।
यही हप्तामा पेट्रोल डिजेलको वितरण सहज हुने भए पनि ग्यासको वितरण सहज गर्न भने एक महिना लाग्ने निगमले जनाएको छ । माग धेरै भएको तर त्यही अनुपातमा लोड र आयात नभएकाले ग्यासको तत्काल वितरण सहज नहुने निगमका प्रवक्ता मुकुन्द घिमिरेले बताए । दैनिक ५०/५५ बुलेट ग्यास आयत हुनुपर्नेमा अहिले दैनिक ४० बुलेको हराहारीमा मात्रै भित्रने गरेको छ ।