२०७२ फाल्गुन ११ गते, मंगलवार

काठमाडौं, ११ फागुन । नेपाल राष्ट्र बैंकले सोमबारका लागि एक अमेरिकी डलरको सटहीदर एक सय १० रुपैयाँ चार पैसा तोकेको थियो जुन अहिलेसम्म कै सबैभन्दा धेरै हो । आइतबारको तुलनामा २० पैसा बढी हो ।
यसअघि फागुन ७ गते डलरको भाउ एक सय ९ रुपैयाँ ९६ पैसा पुगेको थियो । राष्ट्र बैंकले एक सय १० रुपैयाँ चार पैसा तोकेपनि बजारमा भने डलरको कारोबार एक सय १० रुपैयाँ ५० पैसासम्ममा भएको छ । खुलाबजारमा बाणिज्य बैंकले विदेशी मुद्राको कारोबार गर्न आफ्नै दर तोक्न पाउने व्यवस्था छ ।
नेपाली रुपैयाँ डलरसँग कमजोर हुनुको कारण नेपालको अर्थतन्त्र भने होइन । भारतीय रुपैयाँसँग नेपाली रुपैयाँको स्थिर विनिमयदरका कारण भारु कमजोर भएकाले नेपाली रुपैयाँ पनि कमजोर भएको हो ।
डलरको मूल्य बढी हुँदा विदेशमा काम गर्ने नेपालीलाई रेमिट्यान्स पठाउँदा फाइदा हुन्छ भने निर्यातकर्तालाई पनि मुनाफा नै हुन्छ । तर डलर तिरेर विदेशबाट आयात गर्ने सामानको मूल्य भने बढी तिर्नु पर्छ ।