२०७२ चैत्र १२ गते, शुक्रबार

काठमाडौं, १२ चैत । काठमाडौंबाट सिस्नेरी हुँदै हेटौंडा जाने र फाखेल हुँदै हेटौंडा जाने दुबै सडकमा सवारी आवागमन प्रभावित भएको छ । सडक मर्मत र बिस्तारका कारण छोटो दुरीका दुबै सडकखण्डको आवागमन प्रभावित भएको हो । काठमाडौं–फाखेल–हेटौंडा सडक शुक्रबारबाट एक महिनासम्मका लागि पूर्ण रुपमा बन्द गरिएको छ । सडक मर्मतका लागि यातायात संचालनमा रोक लगाइएको हो ।
त्यस्तै काठमाडौं–सिस्नेरी–हेटौंडा सडक भने विहान १० बजेदेखि ५ बजे सम्मका लागि बन्द गरिएको इलाका प्रहरी कार्यालय फर्पिङले जनाएको छ ।
काठमाडौंबाट बिरगंज, रौतहट बारा र पर्सा जाने आउने सवारी साधनले उक्त समयावधिभर नौबिसे–टिस्टुङ्ग–पालुङको बाटो प्रयोग गर्न सक्नेछन् । त्यस्तै सर्लाही जाने आउने सवारी साधनले बनेपा, भकुण्डेवेसी, सिन्धुली खुर्कोट हुदै बर्दिवासको बाटो बैकल्पिक रुपमा प्रयोग गर्न सक्ने ट्राफिक प्रहरीले जनाएको छ ।