२०७२ चैत्र २७ गते, शनिबार

काठमाडौं,२७ चैत्र । नेपाल विद्युत प्राधिकरणले दैनिक ३ घण्टाका दरले लोडसेडिङ घटाएको छ । अहिलेसम्म दैनिक १२ घण्टासम्म लोडसेडिङ हुँदै आएकोमा घटेर ९ घण्टामा झरेको छ । नदी नालाहरुमा पानीको वहाब बढ्न थालेपछि नेपाल विद्युत प्राधिकरणले अघोषित रुपमा लोडसेडिङ घटाएको हो । पानीको बहाव बढेसंगै विद्युत उत्पादन पनि बढेकाले लोडसेडिङ घटाउन संभव भएको प्राधिकरणले जनाएको छ । केही दिन अघिबाट विद्युत उत्पादन हुने नदीहरुमा पानीको मात्रा बढेकाले विद्युत उत्पादनमा वृद्धि भएको प्राधिकरणको भनाइ छ । दुई हप्ताअघि मात्र प्राधिकरणले एसएलसी परीक्षालाई ध्यानमा राखेर दिनमा एक घण्टा लोडसेडिङ घटाएको थियो । अहिले हप्तामा ७७ घण्टा लोडसेडिङ हुने गरेको छ । प्राधिकरणले पहिलेकै तुलनामा बत्ति केही समय चाँडो आउने वा केही समय ढिला जाने जनाउँदै अस्थायी रुपमा मात्रै लोडसेडिङ घटेको जनाएको छ ।