२०७४ बैशाख १५ गते, शुक्रबार

काठमाडौं , १५ बैशाख । रुपन्देहीमा सञ्चालित एक दर्जन सिमेन्ट उद्योग समस्यामा परेका छन् । सिमेन्ट उत्पादन गर्न आवश्यक क्लिंकर तथा अन्य कच्चा पदार्थको अभाव भएपछि ति उद्योग समस्यामा परेका हुन् । भैरहवा–लुम्बिनी करिडोरमा सञ्चालित सिमेन्ट उद्योगले पर्याप्त कच्चा पदार्थ नपाउँदा झन्डै ६० प्रतिशत उत्पादन घटाउनु परेको बताएका छन् । राष्ट्रिय गौरवका आयोजनासँगै मुलुकमा पुनर्निर्माणले गति लिइरहेका बेला सिमेन्ट उद्योगमा भने समस्या देखिएको छ । यसले पुनर्निर्माणको काम नै प्रभावित हुने संकेत देखिएको छ ।
भारतको उत्तर प्रदेशका मुख्य मन्त्री योगी आदित्यनाथले पद बहाली गरेसँगै अन्डर लोडिङको बहानामा भारतबाट आउने क्लिङ्कर तथा अन्य कच्चा पदार्थमा कडाई गरिदिएपछि नेपाली सिमेन्ट उद्योग संकटमा परेका हुन् । सिमेन्ट उत्पादनका लागि आवश्यक क्लिङ्कर, फ्लाईएस, जिपसनलगाएतका कच्चा पदार्थका लागि यहाँका अधिकांश उद्योग भारतसँग पूर्ण निर्भर छन् ।
भारतको मात्रै भर पर्नुपरेका कारण नेपाली सिमेन्ट उद्योगले बेलाबेलामा यस्ता संकट बेहोर्ने गरेका छन् । कच्चा पदार्थको अभाव, ढुवानीको समस्या तथा ढुवानीदर बढेको भन्दै सिमेन्ट उद्योगहरुले सिमेन्टको मूल्य १० प्रतिशतसम्म वृद्धि गरेका छन् ।
सिद्धार्थ सिमेन्ट उद्योग भैरहवाका सञ्चालक रोहित अग्रवालले भारतमा अन्डर लोडिङको समस्याका कारण नेपाली उद्योग बन्द हुने अवस्थामा पुगेको बताए । एउटै गाडीले ३५ देखि ४० टन माल ल्याउने गरेकोमा अहिले त्यो घटेर १५ टनमा सिमित भएकाले कच्चा पदार्थ अभाव भएको उनको भनाइ छ । यस्तै अवस्था रहे अबको एक हप्ताभन्दा बढी उद्योग चलाउन नसकिने उनको भनाई छ ।
कच्चा पदार्थ अभाव भएपछि केही उद्योगले उत्पादन बन्द गरिसकेका छन् । पश्चिमाञ्चल सिमेन्ट उत्पादक संघका महासचिवसमेत रहेका जगदम्बा सिमेन्ट ईन्डस्ट्रिजका महाप्रबन्धक बिदुर ढुंगानाले ट्रकको अभावसँगै ढुवानी लागत पनि बढेको बताए । उनले समस्या समाधान नभए उद्योग बन्द गर्नुको विकल्प नभएको बताए ।
भारतले बीएस थ्रीका गाडीको नयाँ दर्तामा बन्देज लगाएपछि आवश्यक गाडीको अभाव चर्किएको बृज सिमेन्ट ईन्ड्रस्ट्रिजका महाप्रबन्धक रविरञ्जन कुमारले बताए ।
बजारमा सिमेन्ट अभाव हुँदा सर्वसाधरणले निर्माण गर्दै आएका घर बीचमै रोक्नुपर्ने अबस्था आएको छ भने नयाँ घर बनाउनेलाई पनि निकै समस्या देखिएको छ । यस्तो समस्या समाधान गर्न सरकारले नै तत्काल पहल गर्नुपर्ने देखिन्छ ।