२०७४ असार ८ गते, बिहीबार

काठमाडौं, ८ असार । तेह्रथुममा परम्परागत हाते मेसिनबाट तयार गरिँदै आएको ढाका कपडाको बजार प्रवद्र्धनका लागि महिलालाई शीपमूलक तालिम दिइएको छ । यहाँका महिलाले हाते मेसिनबाट बुनेको ढाका कपडा देश विदेशमा चर्चित छ । तर बजारीकरणका लागि विचौलियाको भर पर्दा उद्यमीले न्यून मूल्य मात्रै पाउने गरेका छन् ।
गरिबी निवारण कोषले उद्यमीलाई अन्तर्राष्ट्रिय बजारमा रुचाइएको डिजाइन, त्यहाँसम्म पुर्‍याउने माध्यम र मूल्य निर्धारणबारे जानकारी दिएर उनीहरुको आयस्तर वृद्धि गराउन शीपमूलक तालिम दिएको हो । ‘परम्परागत व्यवसायमा सीपको विकास, परिमार्जित प्रविधि नै बजारीकरणको निकास’ भन्ने नारासहित गरिबी निवारण कोष कार्यक्रमअन्तर्गत जापान सामाजिक विकास कोषको सहयोगमा १ सय ५ जना उद्यमीलाई आकर्षक डिजाइन, कपडाको रंग, बुट्टा, बजार व्यवस्थापन र मूल्य निर्धारणसम्बन्धी ज्ञान दिइएको जिल्ला कार्य प्रबन्धक नरेन्द्र कटुवालले जानकारी दिए ।