२०७४ असार २८ गते, बुधबार

काठमाडौं, २८ असार । यातायात व्यवस्था विभागले राजधानीको चक्रपथमा ‘पिक आवर’मा ठूला मालवाहक गाडी सञ्चालन गर्न रोक लगाएको छ । विभागले आजदेखि लागू हुने गरी चक्रपथमा ट्रक, टिपर, मिनी ट्रकलगायतका मालवाहक गाडी चलाउन समयसीमा तोकेको हो । नयाँ नियमअनुसार बिहान साढे ८ बजेदेखि साढे १० बजेसम्म र दिउँसो साढे ३ बजेदेखि साँझ साढे ६ बजेसम्म ट्रक, टिपर, मिनी टाटालगायतका मालवाहक गाडी चक्रपथमा गुडाउन पाइने छैन ।
विभागले ट्रक तथा टिपर व्यवसायी महासंघ, राष्ट्रिय यातायात व्यवसायी महासंघलगायतका सरोकारवालासँग छलफल गरी यो निर्णय लागू गरेको जनाएको छ ।
उपत्यकामा अहिले भइरहेको अत्याधिक जामलाई न्यूनीकरण गर्न पिक आवरमा चक्रपथमा मालवाहक सवारी बन्देजको निर्णय गरेको विभागले जनाएको छ । यसअघि चक्रपथभित्र ट्रक, टिपर र मिनी ट्रक बिहान ६ बजेदेखि बेलुका ८ बजेसम्म गुडाउन रोक लगाइएको थियो । यो नियम पनि यथावत् छ । विभागको निर्देशनविपरित अटेर गरी गाडी गुडाएमा ५ हजार रुपैयाँसम्म जरिवाना हुने कानुनी व्यवस्था छ ।