२०७८ चैत्र १५ गते, मंगलवार

काठमाडौँ । नेपाल कम्युनिस्ट पार्टी केन्द्रिय समितिको १२औँ पूर्ण बैठकले आर्थिक अनियमितता छानविन गर्ने निर्णय गरेपछि भीम चापागाईले पार्टी परित्याग गरेका छन् । नेकपाको केन्द्रीय प्रकाशन रातो खबर प्रकाशन गृहका प्रबन्ध निर्देशक भीम चापागाईले प्रकाशन विभागमा रहँदा गरेको आर्थिक अनियमितता छानविन गर्ने निर्णय गरेपछि पार्टी परित्याग गरेका हुन् । चापागाईले पार्टीको केन्द्रीय प्रकाशनको नाममा आर्थिक अराजकता मच्चाएपछि एक बर्ष अगाडी नै पार्टी हेडक्वाटरमा उजुरी परेको थियो । त्यसपछि पार्टीले चापागाईलाई रातो खबर प्रकाशन गृहको प्रबन्ध निर्देशकबाट हटाएर मनाङ कार्यक्षेत्र खटाएर पठाएको थियो । चापागाईले पार्टी निर्देशनलाई उलङ्घन गर्दै कार्यक्षेत्रमा नगई उपत्यका र पोखरामा बसेर पार्टी नीति विपरित आर्थिक गतिविधि गर्दै आएको नेकपाका एक केन्द्रीय सदस्यले जनबाटोलाई बताए । उनका अनुसार चापागाईले प्रकाशन विभागको जिम्मेवारीमा रहँदा आर्थिक अनुशासन उलङ्लन गरेकोले पार्टी केन्द्रीय समितिको आज सम्पन्न १२ औं पूर्ण बैठकले छानविन गर्ने निर्णय गरेको थियो । ‘चापागाईले गरेको आर्थिक अनियमिताबारे पार्टीले छानविन अगाडी बढाएपछि भागेको हुनसक्छ’–एक केन्द्रीय सदस्यले जनबाटोलाई बताए । उनले भने,’चापागाईमाथि छानविन सकिएपछि थप कदम चालिन्छ ।’यसअघि प्रतिबन्धको समयमा समेत चापागाईलाई यसबारे पार्टीले सचेत बनाएको थियो । नेकपाको केन्द्रीय समितिको १२ औं पूर्ण बैठक सकिएलगत्तै केन्द्रीय समितिको निर्णय सार्वजनिक नहुँदै चापागाइले सोमबार साँझ प्रेस वक्तव्य जारी गरी पार्टीमा नरहेको बताएका छन् । चापागाईले चुनावबारे पार्टी नीति ‘अस्पष्ट’ भएको हवला दिदै वक्तव्य जारी गरेका छन् ।