२०८० आश्विन ८ गते, सोमबार

काठमाडौँ । वाणिज्य विभागले गृहेश्वरी ट्रेडलिंकको चिनी गोदाम सिल गरेको छ । विभागले कालोबजारी गरेको आरोपमा उक्त गोदाम सिल गरेको हो। विभागका सूचना अधिकारी आनन्दराज पोखरेलले चिनीको गोदाम सिल गरेर चिनीको गुणस्तर परिक्षणका लागि पठाइएको बताउदै भने- ‘गृहेश्वरी ट्रेडलिंकको चिनी गोदाम सिल गरिएको छ । करिब ७० हजार किलो चिनी भण्डारण गरेको भेटिएको छ,’ पोखरेलले भने,‘अहिले चिनीको गोदाम सिल गरेर चिनीको गुणस्तर परीक्षणका लागि पठाइएको छ ।’
विभागमा सन्तोष खेतानको उक्त फर्मले उद्योगहरुबाट सस्तोमा खरिद गरेको चिनी काठमाडौंमा बिल बिजकविना नै महँगो मूल्यमा बिक्री गरेको भनि उजुरी परेको थियो ।
खुद्रा व्यापार संघका अधिकारीहरुका अनुसार १२७ रुपैयाँ किलो होलसेलमा चिनी बिक्री गरेर खेतानले १०५ रुपैयाँको मात्रै बिल दिने गरेका थिए । दुई साता अघिसम्म ११० रूपैयाँ किलोमा बिक्री भइरहेको चिनीको मूल्य हाल १४० रूपैयाँ किलोसम्म पुर्‍याइएको छ ।