जेठ ३१ गते रातिदेखि परेको अविरल वर्षाका कारण देशैभरि बाढी, पहिरो र डुबानले केही व्यक्तिको ज्यान लिएको छ भने कैयौँ परिवार घरबारविहीन बन्न पुगेका छन् । जनतालाई परेको यस विपत्तिमा सरकारले ठोस भूमिका खेल्न नसकेको भन्दै गुनासो भइरहेको छ । सरकारले तत्काल ती गुनासोको सम्बोधन गर्नु आवश्यक छ भने जनप्रतिनिधि र जनसेवक हौँ भन्दै अहोरात्र कुर्लने संसद्वादी दल र नेताहरुले समेत यस विपत्तिको घडीमा जनतालाई सहयोग गर्न कम्मर कसेर लाग्नुपर्दछ । जनतामाथि आइलागेको यो विपत्तिलाई राजनीतिकरण नगरी उचित व्यवस्थापन गर्नु नै सबै राजनीतिक दल, नेता र आमसचेत नागरिकहरुको दायित्व हो । यो दायित्वबाट कोही नपञ्छियौँ, कोही नभागौँ ।

यसै क्रममा नेपाल कम्युनिस्ट पार्टीले आफ्नो सम्पूर्ण तह र तप्काका नेता, कार्यकर्तालाई विपत्तिमा परेका जनताको उद्दार, राहत र व्यवस्थापनमा लाग्न निर्देशन दिएको छ । पार्टीको निर्देशनअनुसार देशका विभिन्न ठाउँमा नेकपाका नेता, कार्यकर्ताहरु विपत्तिमा परेका जनताको उद्दार, राहत र व्यवस्थापन कार्यमा जुटिसकेका छन् । नेपाल कम्युनिस्ट पार्टीको यस जनउत्तरदायी कार्यको सम्पूर्ण राजनीतिक दल, नेता र शक्तिहरुले अनुशरण गर्नु आवश्यक छ । देशका सम्पूर्ण राजनीतिक दल, नेता र शक्तिहरु जनसेवामा जुट्ने हो भने प्राकृतिक विपत्तिमा परेका जनताको उद्दार, राहत र व्यवस्थापन गर्न कुनै कठिनाई नपर्ने निश्चित छ । तसर्थ, विपत्तिमा परेका जनताको नाममा राजनीति नगरौँ, उनीहरुको उद्दार, राहत र उचित व्यवस्थापनमा सबै राजनीतिक दल, नेता र शक्ति एकजुट भएर लागौँ । अहिलेको आवश्यकता र जनचाहना पनि यही हो, चेतना भया ।