२०७१ जेष्ठ १५ गते, बिहीबार

काठमाडौँ, १५ जेठ। आजवाट काठमाडौंमा मेरुदण्ड शल्यक्रिया सम्वन्धि एसिया प्यासिफिक क्षेत्रीय सम्मेलन सुरु हुँदैछ । एसोसिएसन अफ स्पाइन सर्जन्स अफ नेपालको आयोजनामा आजदेखि तीन दिनसम्म चल्ने सम्मेलनमा शल्यक्रियाको प्रत्यक्ष प्रदर्शनी तथा एसिया प्यासिफिक क्षेत्रका मेरुदण्ड शल्यक्रियासम्वन्धि प्रविधिबारे छलफल हुनेछ ।
आयोजक एसोसिएसन अफ स्पाइन सर्जन्स अफ नेपालका महासचिव रविन्द्रलाल प्रधानका अनुसार, मेरुदण्ड शल्यक्रियाका क्षेत्रमा रहेका सम्भावना र चुनौतीका बिषयमा पहिलो पटक नेपालमा अन्तर्राष्ट्रिय स्तरको कार्यक्रम हुन लागेको हो । सम्मेलनमा भारत, जापान, कोरिया, हङकङ, मलेसिया, भियतनामका विज्ञहरु सहभागी हुनेछन् ।
पहिलो दिन बिहिवार काठमाडौंको सिनामंगलपस्थित काठमाडौं मेडिकल कलेज शिक्षण अस्पतालमा मेरुदण्ड शल्यक्रियाको प्रत्यक्ष प्रदर्शनी र कृत्रिम हड्डीमा शल्यक्रियाको प्रविधि सिकाइनेछ । त्यस्तै, दोस्रो र तेस्रो दिनमा मेरुदण्डको शल्यक्रियाका पछिल्ला प्रविधि र प्रयोगबारे विभिन्न सत्रमा अन्तक्रिया हुने कार्यक्रम आयोजनाका एक प्रमुख रोहित कुमार पोखरेलले जानकारी दिए ।
एसिया प्यासिफिक स्पाइन सोसाइटीको अगुवाईमा हुन लागेको सम्मेलनमा एसोसिएसन अफ स्पाइन सर्जन्स अफ नेपाल, त्रिभुवन विश्वविद्यालय शिक्षण अस्पताल र काठमाडौं मेडिकल कलेज शिक्षण अस्पतालको समेत प्रत्यक्ष सहभागिता रहनेछन् ।