२०८१ फाल्गुन २७ गते, मंगलवार

काठमाडौँ । आगामी चैत ५ गते हुने स्वतन्त्र विद्यार्थी युनियन (स्ववियु) निर्वाचनका लागि आज उम्मेदवारको मनोनयन दर्ता हुँदैछ । प्रत्यक्ष र समानुपातिक दुवै तर्फको उम्मेदवारको मनोनयन पत्र बिहान ११ देखि २ बजेसम्म दर्ता गर्ने कार्यतालिका रहेको छ । सोमबार प्रत्यक्ष तथा समानुपातिक उम्मेदवारको मनोनयन पत्र वितरण गरिएको थियो । त्रिभुवन विश्वविद्यालय (त्रिवि)का ६२ आङ्गिक तथा एक हजार ४० सम्बन्धन प्राप्त क्याम्पसहरुमा निर्वाचन हुन लागेको हो । दुवै तर्फको उम्मेदवारको नामावली उपर दाबी विरोध गर्न फागुन २८ गते तोकिएको छ । त्यसै दिन दुवै तर्फको दाबी विरोध उपर छानबिन गरी उम्मेदवारको नामावली प्रकाशित गरिनेछ । फागुन २९ गते उम्मेदवारको नाम फिर्ता लिने र अन्तिम नामावली सार्वजनिक गरिने कार्यतालिका छ ।