२०८१ चैत्र २१ गते, बिहीबार

काठमाडौँ । नेपाल कम्युनिस्ट पार्टीनिकट अखिल (समाजवादी) ले तीनकुने घटनाको विषयमा छानबिन गरी दोषीमाथि कडा कारबाही गर्न माग गरेको छ । सो संगठनका काठमाडौं जिल्ला समिति अध्यक्ष प्रेम सी र इन्चार्ज ललिजङ्ग सीले प्रेस विज्ञप्ति जारी गर्दै चैत १५ गते भएको तीनकुने घटनाको छानबिन गर्न माग गरेका हुन् ।
उनीहरुले पूर्वराजा ज्ञानेन्द्र शाहको उक्साहट र र प्रलोभनमा पारिएका केही अराजक व्यक्तिले तीनकुने आसपासमा भएको हत्या र विध्वंसका दुस्परिणामहरू सतहमा आउने क्रम नरोकिएको जनाएका छन् । उक्त आन्दोलनको क्रममा कोटेश्वर बहुमुखी क्याम्पसमा बीबीएस तेस्रो वर्षमा अध्ययनरत छात्रा रेविका खत्रीमाथि गोली लागेको थियो ।
अफिसबाट कोठा फर्किने क्रममा दिउँसो ३ बजेतिर कोटेश्वर नजिक गोली लागेर गम्भीर घाइते भएकी उनको सिभिल अस्पताल, बानेश्वरको सघन उपचार कक्षमा उपचार भइरहेको छ । उक्त घटनाप्रति दुःख व्यक्त गर्दै अखिल (समाजवादी) ले उनको निःशुल्क उपचारको व्यवस्था गर्न माग गरेको हो ।
तीनकुने घटनामा सहभागी सबैलाई नियन्त्रणमा लिएर सरकारले निष्पक्ष रुपमा छानबिन गर्नुपर्ने उनीहरूको माग छ । निर्दोष छात्रामाथि गोली चलाउने र तीनकुने आसपास भएका हत्या र विध्वंसात्मक घटनामा संलग्न सबैलाई कारबाही गर्नसमेत माग गरे । विद्यार्थीको हकहित, जनधनको सुरक्षा र गणतन्त्रको रक्षार्थ अखिल (समाजवादी) कठोर प्रतिवादका लागि बाध्य हुनेसमेत चेतावनी दिइएको छ ।

यस बिषयमा अखिल (समाजवादी) काठमाडौं जिल्ला समिति अध्यक्ष प्रेम सी र इन्चार्ज ललिजङ्ग सीले जारी गरेको प्रेस विज्ञप्ती यस प्रकार रहेको छ – ‘मान्छेको चेतना र वस्तुगत आवश्यकताले रद्दीमा पुगिसकेको पूर्वराजाद्वारा उक्साइएका र प्रलोभनमा पारिएका केही अराजक व्यक्तिबाट काठमाडौँ, तीनकुने आसपास भएको हत्या र विध्वंसका दुस्परिणामहरु सतहमा आउने क्रम रोकिएको छैन ।
यसै सन्दर्भमा २०८१ चैत १५ गते पूर्वराजा ज्ञानेन्द्र शाहको विध्वंस चलिरहेको दिन कोटेश्वर बहुमुखी क्याम्पसमा BBS 3rd Year अध्ययनरत छात्रा रेविका खत्री आफ्नो अपिसबाट कोठा फर्किने क्रममा दिउँसो ३ बजेतिर बालग्राम, कोटेश्वर नजिक गोली लागेर गम्भीर घाइते भई सिभिल अस्पताल, बानेश्वरको सघन उपचार कक्षमा उपचार भइरहेको खबरले स्तब्ध तुल्याएको छ । हामी रेविका खत्रीको शीघ्र स्वास्थ्य लाभको कामना गर्दै उहाँको निःशुल्क उपचारको लागि राज्यसँग माग गर्दछौँ ।
हामी स्पष्ट छौं कि यो सम्पूर्ण घटना कथित पूर्वराजा र उनका अराजक समर्थकको मुर्खताको दुस्परिणाम हो । त्यसैले गएको १५ गते तीनकुनेको विध्वंसमा सहभागी सबैलाई नियन्त्रणमा लिएर सरकारले निष्पक्ष रुपमा छानबिन गर्नुपर्छ । निर्दोष छात्रामाथि गोली चलाउने र तीनकुने आसपास जति पनि हत्या र विध्वंसात्मक घटना गराइएका छन् ती घटनामा संलग्न सबै अपराधीको तुरुन्तै पहिचान गरी दोषीलाई हदैसम्मको कारबाही गर्न जोडदार माग गर्दछौं । अन्यथा विद्यार्थीको हकहित, जनधनको सुरक्षा र गणतन्त्रको रक्षार्थ अखिल (समाजवादी) कठोर प्रतिवादका लागि बाध्य हुनेछ ।’