२०८२ भाद्र १५ गते, आईतवार

काठमाडौँ । आज भदौ १५ गते अर्थात राष्ट्रिय पुस्तकालय दिवस। सरकारले विसं २०६५ सालदेखि प्रत्येक वर्ष भदौ १५ गते राष्ट्रिय पुस्तकालय दिवस मनाउँदै आएको छ। यो दिवस तत्कालीन राजा गीर्वाणयुद्ध वीरविक्रम शाहको शासनकालमा विसं १८६९ भदौ १५ गते शुक्रबार पुस्तकालय स्थापना गर्ने कानुनमा लालमोहर लगाइएो ऐतिहासिक दिनको स्मृतिमा दिवस मनाउन थालिएको हो।
यसले नेपालमा पुस्तकालयको सुरुवात भएको तथ्यलाई स्मरण गराउँछ। यस वर्ष पुस्तकालय दिवसको आदर्श वाक्य ‘हाम्रो पुस्तकालयः हाम्रो भविष्य’ तय गरिएको छ। देशभर विविध रचनात्मक, शैक्षिक तथा सन्देशमूलक कार्यक्रम आयोजना गरेर यो दिवस मनाइँदैछ।
पुस्तकालयको क्षेत्रका गतिविधि, चुनौती र आवश्यकता बारे जनचेतना फैलाउने, पुस्तकालय प्रयोगको संस्कृतिलाई प्रोत्साहन गर्ने र ज्ञान–शिक्षाको आधारलाई मजबुत बनाउन यस दिवसको विशेष महत्व रहेको छ।
नेपालमा पुस्तकालयका विभिन्न स्वरूप छन्, जसले अध्ययन, अनुसन्धान र ज्ञान विकासमा महत्वपूर्ण योगदान पुर्‍याइरहेका छन्।