२०८२ भाद्र १५ गते, आईतवार

काठमाडौँ । नेपाल शिक्षक महासंघले भदौ २१ गतेदेखि फेरी सडक आन्दोलनमा जाने चेतावनी दिएको छ । नेकपा एकीकृत समाजवादीको केन्द्रीय कार्यालयमा आइतबार धर्ना दिन पुगेका शिक्षकहरुले यस्तो चेतावनी दिएका हुन् । नेपाल शिक्षक महासंघ नेतृत्वको टोलीले आफूहरुको माग विद्यालय शिक्षक विधेयकमा समावेश गर्न माग गर्दै चौथो दिन पनि सो पार्टीको केन्द्रीय कार्यालयमा धर्ना दिएका छन् । उनीहरुले यसअघि नेपाली कांग्रेस, नेकपा एमाले र नेकपा माओवादी केन्द्रको केन्द्रीय कार्यालय धर्ना दिएका थिए ।
धर्नामा पुगेका उनीहरुले आफूहरुको माग सम्बोधन नभए भदौ २१ गतेदेखि कडा आन्दोलनको कार्यक्रम सार्वजनिक गर्ने घोषणा पनि गरेका छन् । शिक्षक महासंघका अध्यक्ष लक्ष्मीकिशोर सुवेदीले आफूहरुको मागको राजनीतिक दलहरुले सुनुवाई नगरे दोस्रो चरणको आन्दोलन शुरु हुने भन्दै त्यसका लागि तयार रहन समेत सम्पूर्ण शिक्षक र कर्मचारीलाई आह्वान गर्नुभयो ।
महासंघले विद्यालय शिक्षा विधेयकमा आफूहरुको मुख्य माग सम्बोधन नभएको उल्लेख गरेको छ । त्यसलाई समावेश गर्न राजनीतिक दलहरुलाई दवाव दिन मुख्यालयमा धर्ना कार्यक्रमलाई निरन्तरता दिएको महासंघले जनाएको हो ।