भूतका कारण विद्यालय बन्द

काठमाडौ, १० बैशाख । मलेसियामा भूत आतंकका कारण एउटा विद्यालय बन्द गरिएको छ । झारफुक र तान्त्रिक प्रक्रिया पुरा गर्नका लागि एक दिन विद्यालय बन्द गरिएको हो । स्थानीय संचारमाध्यमका अनुसार उत्तरी मलेसियाको एउटा विद्यालयमा शिक्षक र विद्यार्थीले एउटा अदृष्य शक्तिको अनुभव गरेसँगै विद्यालय बन्द गरिएको हो ।
कोटा भारु सहरस्थित सो विद्यालयमा भूत रहेको भन्दै तान्त्रिकद्वारा झारफुक गराइएको अधिकारीहरुले जनाएका छन् । गत साता केही विद्यार्थी ले एउटा कालो छायाँ देखेको दाबी गरेका थिए । उनीहरुले उक्त छायाँ विद्यालयभित्रै हराएको जिकिर गरेका थिए । लगत्तै यस्तो छायाँ देखेको दाबी गर्नेहरुको संख्या बढेको थियो । एउटा स्थानीय टेलिभिजन च्यानललाई सो विद्यालयका एक शिक्षकले आफ्नो टाउकोमा भारी दबाब महसुस भएको बताएका थिए । अर्को शिक्षकले आफ्नो शरीरमा कुनै अदृष्य शक्ति प्रवेश गर्न खोजिरहेको दाबी गरेका थिए । करिब एक सय विद्यार्थीमा अदृष्य शक्तिको प्रभाव देखा परेको दाबी गरिएको छ । यसलगत्तै विद्यालय प्रशासनले विद्यालय बन्दको घोषणा गरेको थियो । बिहीबार मुस्लिम धर्म गुरुहरुले विद्यालयमा प्रार्थना गरेका थिए । – एजेन्सी