माओवादी केन्द्र भेडी गोठ बन्दै

काठमाडौं, १९ जेठ । नेकपा माओवादी केन्द्रको संगठनसम्बन्धी प्रस्ताव तयार पार्ने जिम्मेवारी पाएको कार्यदलले केन्द्रीय समिति ९ सय ९९ सदस्यीय महाधिवेशन आयोजक समिति बनाउन पार्टी हेडक्वार्टरलाई प्रस्ताव गरेको छ । पार्टी महाधिवेशन आयोजक समिति जम्बो बनाउनुपर्नाको कारण र परिस्थितिसमेतको व्याख्या गर्दै आयोजक समितिमा समेटिने नेताहरूको नामावली समाविष्ट गरेर कार्यदलले प्रतिवेदन बुझाएको हो । अध्यक्ष पुष्पकमल दाहाल प्रचण्डनिवास लाजिम्पाटमा मंगलबार साँझ बसेको बैठकमा कार्यदलका तर्फबाट संयोजक वर्षमान पुन अनन्तले त्यस्तो प्रतिवेदन बुझाएका हुन् ।
माओवादी केन्द्रको यसअघि आयोजक समिति ६ सय ९९ सदस्यीय बनाउने निर्णय भएको थियो । जसमध्ये ५ सय ९९ सदस्य पहिले नै तोकिए पनि १ सय सदस्य पछि थप गर्ने बताइएको थियो । अहिले कार्यदलले रिक्त एक सयसहित चार सयको नामावली पार्टी हेडक्वार्टरमा प्रस्ताव गरेको बताइएको छ ।