महतको राजिनामा माग , नदिए जनकारवाही
२०७४ फाल्गुन २२ गते, मंगलवार
काठमाडौं, २२ फागुन । नेपाल कम्युनिष्ट पार्टी निकट जनपरिषद् नेपालले हेटौँडा उपमहानगरपालिकाका मेयर हरिबहादुर महतलाई राजीनामा गर्न चेतावनीसहितको पत्र थमाएको छ । मेयर महतले जनताको सेवा गर्नुको साटो भ्रष्टाचारी, कमिशन खोर र दलाल-माफियाहरुको संरक्षणमा लागेको भन्दै जनपरिषद् मकवानपुरले राजिनामा गर्न पत्र थमाएको हो । नेकपा मकवानपुरका इन्चार्ज विरबहादुर घलान ‘ज्वाला’ मार्फत् जनपरिषद्ले मेयर महतलाई राजीनामा माग पत्र बुझाएको हो । ‘जनतालाई शान्ति सुरक्षा र सुख दिनु पर्नेमा मेयर महतले जनतालाई सास्ती दिने र दलालहरुको संरक्षण गरिरहेकोले राजीनामा मागिएको हो’ इन्चार्ज ज्वालाले बताए । मेयर महतले तत्काल राजिनामा दिएमात्रै नगरवासीको भलो हुने जनपरिषद्ले उपत्रमा उल्लेख गरेको छ ।
परिषद्का मकवानपुर प्रमुख निर्दोष क्षत्रिले हस्ताक्षर गरेको पत्र कार्यालयमै पुगेर अाइतबार महतलाई बुझाइएको हो । महतले एमालेको तर्फबाट मेयरमा विजयी भएका थिए । मेयर महतले राजिनामा नदिए जनकारवाहीको चेतावनीको चेतावनी पत्रमा दिइएको छ । जनपरिषद्ले देशैभरीका जनप्रतिनिधिको राजिनामाको माग गर्दै पत्र बुझाउँदै अाएको छ ।
