२०८१ भाद्र १ गते, शनिबार

काठमाडौँ । नेपाल कम्युनिष्ट पार्टी सुदूरपश्चिम प्रदेशले देशभक्त, कम्युनिष्ट, समाजवादी र लोकतान्त्रिक गणतन्त्रवादी शक्तिसँग सहकार्य गर्ने निर्णय गरेको छ । सो पार्टीका स्थायी कमिटी सदस्य तथा सुदूरपश्चिम प्रदेश इन्चार्ज भरत सीको अध्यक्षतामा हालै सम्पन्न बैठकले उक्त निर्णय गरेको हो । बैठक पछि प्रदेश इन्चार्ज भरत सीले विज्ञप्ति जारी गर्दै देशभक्त, कम्युनिष्ट, समाजवादी र लोकतान्त्रिक गणतन्त्रवादी शक्तिसँग सहकार्य गर्ने निर्णय गरेको जानकारी गराएका छन । बिज्ञप्तिमा पार्टीको केन्द्रीय नीति अनुरूप चार मित्रशक्ति, चार मित्रवर्गका रूपमा किसान, मजदुर, मध्यम वर्ग र राष्ट्रिय पुँजीपति वर्ग र छ मित्र समुदायका रूपमा खसआर्य, जनजाति,मुस्लिम, मधेशी, महिला र श्रमिक दलित वर्गबाट ध्रुवीकरण र एकतामा जोड दिने निर्णय गरेको विज्ञप्तिमा उल्लेख गरिएको छ ।
यसैगरी, प्रदेश सचिवालयको बैठकले नेपाली विशेषताको समाजवाद र एकीकृत जनक्रान्तिबारे स्पष्ट पार्न आन्तरिक स्कुलिङ, प्रशिक्षण र बाह्यरूपमा भेटघाट तथा अन्तरक्रिया गर्ने, पार्टी प्रदेश कार्यालयका तर्फबाट सरकारी कार्यालय समन्वय विभाग गठन गरी जनताको काममा सहजिकरण गर्ने निर्णय गरेको प्रदेश इन्चार्ज भरत सीद्वारा जारी प्रेस विज्ञप्तिमा उल्लेख गरिएको छ । एमसीसी र त्यसका नाममा बढेको अमेरिकी हस्तक्षेपको भण्डाफोर गर्ने, शिक्षा, स्वास्थ्य र विकास,अनुदानका योजनामा भएका विकृत्ति र भ्रष्टाचार विरूद्ध संघर्ष गर्ने, सुदूरपश्चिम प्रदेशमा भएको बजेट शुन्यताको अन्त्य गर्न ध्यानाकर्षण गराउने, पार्टीको उत्पादनको योजनाका कार्यले राम्रो प्रभाव पारेको र त्यसलाई प्रभावकारी, प्रविधिमैत्री र विस्तार गर्ने निर्णय गरेको विज्ञप्तिमा उल्लेख गरिएको छ ।