२०८१ चैत्र १६ गते, शनिबार

काठमाडौँ । नेपाल कम्युनिस्ट पार्टीले आम नेपाली परिवर्तनप्रेमी जनतालाई प्रतिगमनकारी एवं यथास्थितिवादी दलाल पुँजीवादका विरुद्ध संघर्ष गर्न आग्रह गरेको छ । सो पार्टीका महासचिव विप्लव सीले शनिबार एक बिज्ञप्ति जारी गर्दै आम नेपाली परिवर्तनप्रेमी जनतालाई प्रतिगमनकारी एवं यथास्थितिवादी दलाल पुँजीवादका विरुद्ध संघर्ष गर्दै समाजवादतिर अगाडि बढ्न नेपाली जनतालाई विशेष अपिल गरेका हुन् ।
यसैगरी , महासचिव विप्लव सीले शुक्रबार समाजवादी मोर्चाले आयोजना गरेको विशाल जनसभामा सहभागीलाई धन्यवाद दिदै राजावादी—प्रतिगमनकारी तत्वहरुले हिजै आयोजना गरेको सभालाई अराजकताको संज्ञा दिएका छन् ।
महासचिव विप्लव सीद्वारा जारी बिज्ञप्तिमा भनिएको छ – ‘देशमा लादिएको यथास्थितिवादी प्रवृत्ति एवं प्रतिगामी षडयन्त्रका विरुद्ध समाजवादी मोर्चा नेपालद्वारा आयोजित विशाल जनसभा गणतन्त्रवादी नागरिकहरुको व्यापक एवं भव्य उपस्थितिमा सानदार ढङ्गले सफल भयो । हाम्रो जनप्रिय पार्टी गणतन्त्रको रक्षा तथा समाजवादी गणतन्त्रका पक्षमा उपस्थित आम जनता एवं चारै पार्टीका नेता-कार्यकर्ताप्रति हार्दिक आभारसहित धन्यवाद ज्ञापन गर्दछ ।
हिजोकै दिन राजावादी-प्रतिगमनकारी तत्वहरुले काठमाण्डौंको तीनकुनेमा विरोध सभा आयोजना गर्ने वहानामा भिड जम्मापारेर विध्वंस मच्चाउने कार्य गरे । विध्वंसका क्रममा नेकपा (एकीकृत समाजवाद) को केन्द्रीय कार्यलय, जिल्ला कार्यालय, नेकपा एसका अध्यक्ष तथा पूर्वप्रधानमन्त्री माधव कुमार नेपालको घर, भाटभटेनी सुपर मार्केट, कान्तिपुर, अन्नपूर्ण पत्रिका कार्यलय साथै विभिन्न निजी घरहरुमा तोडफोड गर्ने, सवारीसाधनमा आगजनी गर्ने अति निन्दनीय, अराजक, ध्वंसात्मक कार्य गरे । हाम्रो पार्टी उक्त विध्वंसकारी कार्यको घोर भर्त्सना गर्दछ र अपराधिकहरुलाई कडा कारवाहीको माग गर्दछ । घटनाबारे जानकारी गाउँदा पनि लामोसमय प्रहरी प्रशासन नपुग्नुका पछाडि के कारण थियो राज्यका सम्बन्धित निकायले जाँचबुझ गर्न आग्रह गर्दछ ।
देशमा राजनीतिक अस्थिरता, आर्थिक संकट, भ्रष्टाचार, साँस्कृतिक विचलन, विदेशी हस्तक्षेप चरम अवस्थामा पुगेको छ । यसैका कारण प्रतिगमनकारी हर्कतले फैलिने मौका पाएको हाम्रो निस्कर्ष छ । यसको निकास प्रतिगमन त हुँनै सक्दैन, यथास्थितिमा गोलचक्कर लगाइ राख्ने दलाल पुँजीवादी प्रवृत्ति र संसदीय व्यवस्थाबाट पनि संभव छैन । यसका लागि नेपाली विशेषताको समाजवाद या वैज्ञानिक समाजवादी व्यवस्थाको स्थापना अपरिहार्य छ । हाम्रो पार्टी आम नेपाली परिवर्तनप्रेमी जनतालाई प्रतिगमनकारी एवं यथास्थितिवादी दलाल पुँजीवादका विरुद्ध संघर्ष गर्दै समाजवादतिर अगाडि बढ्न विशेष अपिल गर्दछ ।’