२०८१ चैत्र १८ गते, सोमबार

काठमाडौँ । नेपाल कम्युनिष्ट पार्टी ,नेकपा माओवादी केन्द्र , नेकपा (एकीकृत समाजवादी) र नेपाल समाजवादी पार्टीसम्मिलित समाजवादी मोर्चा नेपालले गणतन्त्रविरुद्धको षड्यन्त्र असफल बनाएरै छाड्ने उद्घोष गरेको छ । समाजवादी मोर्चा नेपालले शुक्रबार काठमाडौँ आयोजना गरेको बृहत् जनप्रदर्शनपछि आयोजित जनसभालाई सम्बोधन गर्दै मोर्चाका शिर्षथ नेताहरुले सो उद्घोष गरेका हुन् ।
उक्त जनसभालाई सम्बोधन गर्दै नेपाल कम्युनिस्ट पार्टीका महासचिव तथा समाजवादी मोर्चा नेपालका संयोजक विप्लव सीले सामन्ती तत्त्वहरूले गणतन्त्रविरुद्ध षड्यन्त्र गरिरहेको ठोकुवा गरे । उनले भने – ‘नेपाली जनताले सामन्तवादी प्रवृत्ति, अधिनायकवादी हर्कतलाई पराजित गरेका छन् । जसको स्वर्ग ढल्यो, ती तत्वले विदेशीको उक्साहटमा गणतन्त्रविरुद्ध षडयन्त्र भइरहेको छ। नेपाली जनता गणतन्त्रसँग गौरव गर्छन् । प्रतिगामीहरूले राजतन्त्र फर्काउने कुरा गरेका छन् । हामीलाई कुनै प्रभुको खाँचो छैन । हामीलाई सामन्तवादी हैकम चलाउनेहरूको खाँचो छैन । हामी मुक्ति चाहन्छौ । फेरि सामन्तीका भूतले अर्को बोझ थप्न खोजे हामी स्वीकार गर्छौ ?’
यसैगरी, संयोजक विप्लव सीले मुलुकमा राजतन्त्र फर्काउन खोजे फेरि राजावादीहरू पछुताउनु पर्ने बताउदै भने– ‘नेपालमा किन राजतन्त्र चाहियो ? अढाई सय सालसम्म राजतन्त्रले के गर्यो ? पञ्चायतदेखि अहिलेसम्म सबै थाहा छ । पञ्चायतमा बोल्न पाइँदैनथ्यो । कमैया, दलित, किसानमाथि दमन थियो। यसको समाधान सामन्तवादी हुन सक्छ ? जनआन्दोलन, विद्रोहले ध्वस्त भएका मान्छेहरू धुलो टकटकाउँदै उठ्न थालेका छन् । विभिन्न प्रवृत्ति गठजोड गरेर राजतन्त्र फर्काउन खोजेका छन् । राजतन्त्र फर्केर के हुन्छ ? उनीहरू फेरि पछुताउनुपर्छ ।’
यसैगरी, संयोजक विप्लव सीले गणतन्त्र आएपछि केही मान्छेहरूको उठीबास भएको बताए । उनले दुई वटा दुस्मनविरुद्ध सँगै लडेको स्मरण गर्दै सामन्तवादको बन्धनलाई नेपाली जनताले उठ्नै नसक्ने गरी परास्त गरेर गणतन्त्र आएको बताउदै भने– ‘जसले हारे, सत्ता गुमाए, स्वर्गको आनन्द भङ्ग भएको महसुस गरे उनीहरू विदेशी शक्तिको आडमा गणतन्त्रविरुद्ध षड्यन्त्र भइरहेको छ। नेपाली जनता गणतन्त्रसँग गौरव गर्छन्, केही मान्छे प्रतिगामीहरू राजतन्त्र फर्काउन प्रयास गरिरहेका छन् हामीलाई सामन्तीहरूको खाँचो छैन ।’
संयोजक विप्लव सीले गणतन्त्रवादीहरुले आफ्ना कमजोरी सच्च्याउनु पर्ने बताए । उनले समाजवादले मात्र किसान, युवा विद्यार्थीका समस्या समाधान गर्ने भन्दै भइरहेका खेलहरूबाट विचलित हुन आवश्यक नभएको बताउदै भने– ‘नेपालमा ढलेको ध्वस्त भएको शासन आउन सम्भव छैन। ‘धेरै मच्चिन जरुरी छैन मच्चिए थच्चिनुपर्छ ।’
यसैगरी, संयोजक विप्लव सीले जनताको बलद्वारा धुलो परिएका सामन्ती तत्वहरुको विरुद्धमा आफूहरु निरन्तर लागिरहने बताए । उनले नेपालमा अब राजतन्त्र सम्भव नरहेको ठोकुवा गर्दै भने– ‘तपाईँ ढुक्क हुनुस्, त्यो सम्भव छैन । नेपालमा सम्भव छैन, ढलेको, ध्वस्त भएको शासन फर्केर आउन सम्भवभ छैन । हामी सचेत छौं, जागरुक छौं । यहाँ बजारमा अनेकौं हल्ला, काटमार, बम पड्किन्छ । श्वेत उग्रवादीहरुको विभिन्न खालका अराजकताहरु र हल्ला सुनिरहेका छौं । कोही पनि चिन्तित हुनु जरुरी छैन । धेरै मच्चिन हुँदैन । मच्चेपछि थचारिनुपर्छ । त्यसैले हामी कोही पनि विचलित हुन जरुरी छैन । देशलाई समाजवादतिर लाने हो । देशले वर्षौंदेखि चाहेको विकल्प भनेको समाजवाद हो । समाजवादको विकल्पमा जानुपर्छ । हामी तयार छौं ।’
यसैगरी , सोहि जनसभालाई सम्बोधन गर्दै नेकपा माओवादी केन्द्रका अध्यक्ष प्रचण्डले पूर्वराजा ज्ञानेन्द्र शाहलाई अर्को गल्ती नगर्न चेतावनी दिए । उनले नेपाली जनता र राजनीतिक दललाई कमजोरी ठानेर इतिहासमा फर्कने दुस्साहस नगर्न चेतावनी दिंदै भने – ‘नेपाली जनता र राजनीतिक दललाई कमजोरी ठानेर इतिहासमा फर्कने दुस्साहस नगरियोस् । अब अर्को गल्ती गरे भोग्न बाँकी केही रहँदैन । खबरदार ।’
अध्यक्ष प्रचण्डले विगतमा गरिएका कमजोरीकै कारण इतिहास बनिसकेको राजतन्त्रले टाउको उठाउन खोजेको बताए । उनले जनआन्दोलन र जनयुद्धको माध्यमबाट सामन्ती राजतन्त्रको ढाड भाँचेको भए पनि संविधान जारी गरेपछि गरिएका केही कमजोरीका कारण अहिले उनीहरूले टाउको उठाउने कोशिश गरेको बताए । उनले भने– ‘जनयुद्धको नेतृत्वकर्ता, शान्ति सम्झौता, गणतन्त्र घोषणा र संविधान निर्माणको नेताको हैसियतले देशभरका जनतालाई भन्न चाहन्छु, समस्या विगतमा केही त्रुटी गरेकाले पनि पैदा भएका छन् । हामी गणतन्त्रवादीहरूले केही कमजोरी गरेकैले दलाल, नोकरशाहीहरूले पनि थुप्रै लाभ लिने अवसर प्राप्त गरे । तर, अब त्यसलाई सच्याइनेछ ।’
अध्यक्ष प्रचण्डले समाजवादी मोर्चा र व्यक्तिगत तर्फबाट आत्मआलोचना गर्दै अब जनअपेक्षा अनुसार काम गर्ने र इतिहासमा कुडाकर्कट बनिसकेकाहरूले टाउको उठाउन चाहेकालाई आन्दोलनवाट अन्त्य गर्ने बताउदै भने –‘गल्तीबाट शिक्षा लिएर पुनः मजदुर, किसान, उत्पीडित जनता, महिला, मुस्लिम सबैको पक्षमा काम गर्न अर्को क्रान्तिको नेतृत्व गर्न हामी तयार भएका छौं। यो कुरा मञ्चबाट औपचारिकताको लागि मात्र भनिराखेको छैन । एउटा नयाँ आन्दोलन, नयाँ क्रान्तिको नेतृत्वद्वारा अहिले देखिएको समस्या समाधान गर्न चाहन्छौं ।’
उक्त जनसभालाई सम्बोधन गर्दै नेकपा एकीकृत समाजवादीका अध्यक्ष माधवकुमार नेपालले राजतन्त्र फर्काउन खोजे ठूलो मूल्य चुकाउनुपर्ने चेतावनी दिए । उनले यो देशमा कसैले फेरि वंशको शासन ल्याउन खोज्छ भने त्यसले ठुलो मूल्य चुकाउनुपर्ने चेतावनी दिंदै भने– ‘यो कार्यक्रम नेपालको राजनीतिमा कास्टिङ मात्र हो । प्रतिगामीहरु होसयार । यो मुलुक वंश, परिवारको शासनतिर फर्कन सक्दैन । जनता स्वाधीन छन्। सार्वभौमसत्ता सम्पन्न भएका छन्। नेपाली जनता कसैको दास बन्न सक्दैनन् । इतिहास पछाडि जान सक्दैन । वंशको शासन ल्याउने चेष्टा कसैले गर्छ भने ठूलो मूल्य चुकाउनुपर्नेछ ।’
अध्यक्ष नेपालले शासकको कमजोरीका कारण जनताले समस्या भोगिरहेको तर सरकार तमासे भएर बसेको बताउदै भने– ‘हामीले सरकार ढालेका छैनौ तर सरकार ढले..ढले… भनिरहेको छ । ’
यसैगरी, उक्त जनसभालाई सम्बोधन गर्दै नेसपाका अध्यक्ष महिन्द्रराय यादवले संविधानमा रहेका सङ्घीयता, गणतन्त्र, धर्मनिरपेक्ष र समानुपातिक समावेशी संविधानका चार खम्बामध्ये एक खम्बा समानुपातिक समावेशी पक्ष हटाउन वर्तमान सरकार लागिरहेको ठोकुवा गरे । उनले सरकारले समावेशी समानुपातिक व्यवस्था हटाएर अधुरो बनाउन खोजेको दावी गर्दै सङ्घीय लोकतान्त्रिक गणतन्त्र नेपालमा संविधानको रक्षा गर्न ठुलो चुनौती खडा भएको बताए।
अध्यक्ष यादवले सरकारको भ्रष्टाचारी प्रवृत्तिका कारण पूर्वराजावादी र पूर्वपञ्चहरुले टाउको उठाउने मौका पाइरहेको बताउदै देशमा बढेको बेथिति नियन्त्रण गरेर सुशासन कायम गर्नुपर्ने पनि बताए । उनले भने– ‘प्रतिगामी, पुनर्उत्थानवादी शक्तिहरू देशलाई कमजोर बनाउने प्रयत्नमा लागेका छन् । यस्तो अवस्थामा परिवर्तन पक्षधर शक्तिहरू एक हुन जरुरी छ । नेपालको स्वाधीनता र राष्ट्रिय अखण्डता कायम राख्न जरुरी छ ।’
अध्यक्ष यादवले देशमा बढेको वितृष्णा मेटाउन र मुलुकका हर समस्या समाधान गर्न सरकारबाट सम्भव नहुने भन्दै गणतन्त्र र सङ्घीयता पक्षधर एक ठाउँमा आउन जरुरी रहेको बताए ।
अध्यक्ष यादवले देशबाट गणतन्त्र अन्त्य गराउने प्रयत्न भए पुनः द्वन्द्वको सिर्जना हुने पनि चेतावनी दिंदै भने – ‘अहिले जुन प्रकारको गतिविधिमा हिँडिरहेको छ, मलाई त लाग्दैन यो सरकारबाट अब संविधानको रक्षा हुन सक्दैन । संविधानको रक्षाको लागि, गणतन्त्रको रक्षाका लागि, संघीयताको रक्षाको लागि, धेरै ठाउँबाट संघीयतामाथि प्रहार भइराखेको छ । अहिले संघीयता हटाउन जुन प्रकारको प्रयास भइराखेको छ । यो देशमा संघीयता हट्यो भने देशमा द्वन्द्वको सिर्जना हुनसक्छ । त्यस कारणले भएको उपलब्धी रक्षा गर्नुपर्छ।
अध्यक्ष यादवले सरकारले अनुचित तरिका र प्रतिशोधको भावनाबाट कुलमान घिसिङलाई नेपाल विद्युत प्राधिकरणको कार्यकारी निर्देशकबाट हटाइएको बताए । उनले यस निर्णयमा पुनर्विचार गर्न सरकारलाई सुझाव दिंदै भने– ‘कुलमान घिसिङलाई यो सरकारले अनुचित तरिका र प्रतिशोधको भावनाले हटाएको छ । यसलाई पुनः सरकारले गम्भीरताको साथ सोचोस् । त्यस्ता राष्ट्र सेवक कर्मचारीहरुलाई सरकारले सुधार गरोस्। ’
यसैगरी उक्त जनसभामा स्वागत मन्तब्य राख्दै नेकपा माओवादी केन्द्रकी उपाध्यक्ष पम्फा भुसालले पूर्वराजा ज्ञानेन्द्र शाहलाई राजनीति गर्न मन भए दल खोलेर या कुनै दलमा सहभागी भएर प्रतिस्पर्धामा आउन चुनौति दिइन् । उनले राजनीतिमा आएर प्रत्यक्ष कार्यकारी राष्ट्रपति वा प्रधानमन्त्री बन्नसमेत पूर्वराजा ज्ञानेन्द्रलाई सुझाईन् । उनले १० वर्षे जनयुद्ध , २०६२÷६३ को जनआन्दोलन र मधेश आन्दोलनको पृष्ठभूमिमा नेपालबाट राजतन्त्र अन्त्य भएको उल्लेख गर्दै भनिन् –’ २४० वर्षको विरासत २०५८ को हत्याकाण्डले नै अन्त्य भएको थियो । तर, त्यसको केही समयपछि नेपालबाट विधिवत रुपमा राजावादी विदा भएको हो’ ।
उपाध्यक्ष भुसालले राजतन्त्रको बिदा गर्दै गर्दा पूर्वराजा ज्ञानेन्द्रले मागे अनुसार बस्ने ठाउँ, सुरक्षा र सुविधा दिइएको ख्याल गर्न चेतावनी दिंदै भनिन – ‘मलाइ बस्न बस्न नागर्जुन चाहियो । मलाई केही गाडी चाहिए । केही सुरक्षा चाहियो भनेर पाएपछि नारायणहिटीबाट शान्तिपूर्ण ढंगले बिदा गरिएको हो। ’
उपाध्यक्ष भुषालले गणतन्त्रको विरुद्धमा आवाज उठ्नुमामा वर्तमान सरकार दोषी रहेको बताईन् । उनले अहिले मन्त्रालयहरु माफियाले चलाइरहेको समेत टिप्पणी गरिन् । उनले व्यवस्थाको लागि बगेको १०औं हजार सहिदको रगत मूल्य बोध गर्नसमेत सरकारलाई आग्रह गर्दै भनिन – ‘हामी यतिबेला यो वातावरण सिर्जना गर्ने भ्रष्टाचारीको संरक्षक, माफियाको संरक्षक, अहिले मन्त्रालयहरु माफियाले चलाउँछन्, मन्त्रीहरु विभाग चलाउन जान्छन् । विभागहरुमा कार्यालय खोल्न जान्छन् । नीति निर्माण गर्नुपर्ने मन्त्रीहरु कर्मचारीहरुको सरुवाको अधिकार आफूमा ल्याएर सहसचिवको हैसियतमा बसिराखेका छन् । यसलाई छिटो सच्याउ । १०औं हजार सहिदहरुको रगतको मूल्य बोध गर। ’
नेपाल कम्युनिस्ट पार्टीका महासचिव तथा समाजवादी मोर्चा नेपालका संयोजक विप्लव सीको अध्यक्षतामा सम्पन्न उक्त जनसभाको संचालन नेपाल कम्युनिस्ट पार्टीका प्रवक्ता तथा समाजवादी मोर्चा नेपालका सदस्य सचिव प्रकाण्ड सीले गरेका थिए।